سری دیوی کی موت حرکتِ قلب بند ہونے سے نہیں، ڈوبنے سے ہوئی: دبئی پولیس
بالی ووڈ اسٹار سری دیوی کی موت کی ایک نئی اور اصل وجہ سامنے آگئی ہے اور دبئی پولیس کو دی گئی ان کی پوسٹ مارٹم رپوٹ کے مطابق ان کی موت ’’حادثاتی طور پر ڈوبنے‘‘ سے ہوئی تھی۔اب ان کی میت کی بھارت واپسی کے لیے دوسرے قانونی نقاضے پورے کیے جارہے ہیں۔
دریں اثناء دبئی حکومت کے میڈیا آفس نے اپنے سرکاری ٹویٹر اکاؤنٹ پر یہ اطلاع دی ہے کہ دبئی پولیس نے اب یہ کیس دبئی پبلک پراسیکیوشن کے سپرد کردیا ہے اور وہ اس طرح کے باقی معاملات کی طرح قانونی طریق کار کے مطابق یہ کیس نمٹا رہا ہے۔
بیان میں کہا گیا ہے کہ ’’ پوسٹ مارٹم کے تجزیے کی تکمیل کے بعد دبئی پولیس کے ہیڈ کوارٹر نے بتایا ہے کہ بھارتی اداکارہ سری دیوی کی موت ہوٹل کے اپارٹمنٹ کے باتھ ٹب میں ڈوبنے سے ہوئی تھی ۔وہ ہوش وحواس کھو جانے کے بعد اس میں گر گئی تھیں‘‘۔
قبل ازیں یہ اطلاع سامنے آئی تھی کہ سری دیوی کی موت ہفتے کی شب اچانک دل کی حرکت بند ہو جانے سے ہوئی تھی اور بھارتی حکام اور متوفیہ کے قانونی لواحقین دبئی حکام سے ضروری سرٹیفکیٹس کے حصول کے منتظر ہیں تاکہ ان کی میت کو بھارت منتقل کیا جاسکے۔
بھارتی قونصل خانے کے ایک افسر کا کہنا تھا کہ جب تک ہمیں سرٹیفکیٹس نہیں مل جاتے، ہم نعش کی واپسی کا عمل شروع کرسکتے ہیں اور نہ کوئی وقت دے سکتے ہیں۔انھوں نے مزید بتایا کہ متوفیہ کا پاسپورٹ منسوخ کردیا گیا ہے۔
سری دیوی دبئی میں شادی کی ایک تقریب میں شرکت کے لیے گئی تھیں۔ان کی بیٹی خوشی اور خاوند بونی کپور بھی پہلے سے وہیں موجود تھے۔
