"ڈالروں کے پہاڑ"... خاتون رکن پارلیمنٹ کے گھر کی وڈیو پر عراقی عوام چراغ پا

گذشتہ چند گھنٹوں کے دوران عراقی عوام ان مناظر میں مصروف رہے جن میں موجودہ اور سابقہ ارکان پارلیمنٹ کے گھروں اور دفاتر پر چھاپوں کی تصاویر وائرل ہوئیں، جن پر کرپشن کے الزامات ہیں۔ ان میں خاتون رکن پارلیمنٹ عالیہ نصیف بھی شامل ہیں۔

سوشل میڈیا پر ان کے گھر سے لی گئی تصاویر وائرل ہوئیں جن میں نقدی کے ڈھیر جمع تھے۔

اس کے علاوہ بہت سے عراقیوں نے ان کے بیٹے ساجد کی ملکیت میں موجود گھوڑوں کے فارم پر چھاپے کے مناظر بھی شیئر کیے اور بتایا کہ ان گھوڑوں کی مالیت 70 لاکھ ڈالر سے زیادہ ہے۔

بہت سے لوگوں نے اس کرپشن کے حجم پر برہمی کا اظہار کیا جو دہائیوں بعد اس بے مثال مہم کے دوران بے نقاب ہوئی۔ انہوں نے مطالبہ کیا کہ عراقی عوام کا پیسا چرانے میں ملوث ہر شخص کا احتساب کیا جائے... اور جنہیں انہوں نے "بڑی مچھلیوں اور مگرمچھوں" سے تشبیہ دی، انہیں گرفتار کر کے سزا دی جائے اور جیل میں ڈالا جائے۔

دوسری جانب کچھ لوگوں نے ملک اور عوام کی حالت پر طنز کیا، جبکہ ارکان پارلیمنٹ اپنے گھروں میں دولت جمع کر رہے تھے۔

مزید برآں، کچھ لوگوں نے ان ارکان پارلیمنٹ کی وڈیوز دوبارہ شیئر کیں جنہیں اتوار کے روز گرفتار کیا گیا تھا، جن میں وہ قسمیں کھا رہے تھے کہ وہ "دیانت دار ہیں اور حرام مال کو ہاتھ نہیں لگا سکتے"۔

عراقی رکن پارلیمنٹ عالیہ نصیف کے گھر سے 20 ارب عراقی دینار سے زائد (تقریباً 15.5 کروڑ ڈالر) اور سونا برآمد ہوا تھا، جنہیں ان کے بیٹے کے ساتھ گرفتار کیا گیا۔ ان کا بیٹا سابق عراقی وزیر اعظم محمد السودانی کے دفتر کا ڈائریکٹر تھا۔

یہ سب کچھ ایسے وقت ہوا جب سکیورٹی فورسز نے اتوار کی صبح سویرے انتہائی محفوظ گرین زون میں چھاپہ مار مہم چلائی، جہاں سفارت خانے اور سرکاری مراکز واقع ہیں۔ اس دوران تقریباً 67 عراقی ارکان پارلیمنٹ اور عہدیداروں کو حراست میں لیا گیا۔

العربیہ/الحدث کے نامہ نگار نے واضح کیا کہ گرفتاریاں جاری ہیں اور یہ درجنوں مزید افراد تک پھیل سکتی ہیں۔

واضح رہے کہ یہ گرفتاریاں تیل کی وزارت کے انڈر سیکرٹری برائے ریفائننگ امور عدنان الجمیلی کے بیان کی بنیاد پر ہیں، جنہیں گذشتہ ماہ کرپشن کے الزامات میں حراست میں لیا گیا تھا۔ ایسا لگتا ہے کہ ان کے اعترافات نے عہدیداروں کے ایک بڑے حلقے کو ملوث کیا اور بے نقاب کر دیا ہے۔

الجمیلی سے تحقیقات کے نتیجے میں چند روز قبل 67 ارب دینار اور دس لاکھ ڈالر سے زائد کی نقدی رقم ضبط کی گئی تھی۔