ایران : پولیس کی بے حجاب لڑکیوں کی گرفتاری میں آڑے آنے والے افراد کے خلاف کارروائی

ایران میں اخلاقی پولیس نے دارالحکومت تہران کے شمال مغرب میں واقع علاقے نارمک میں اکٹھے ہونے والے شہریوں کو منتشر کرنے کے واسطے ہوائی فائرنگ کر دی۔ یہ شہری اُن نوجوان لڑکیوں کی گرفتاری کو روکنا چاہ رہے تھے جن کے خلاف مکمل حجاب نہ پہننے پر کارروائی کی جا رہی تھی۔

ایرانی خبر رساں ایجنسی "ارنا" کے مطابق اخلاقی پولیس کے اہل کاروں نے جمعے کی شب مناسب طور پر حجاب نہ پہننے والی نوجوان لڑکیوں کو حراست میں لینے کی کوشش کی تو شہریوں کے جتھے کی جانب سے انہیں مزاحمت کا سامنا کرنا پڑا۔ اس پر پولیس کے اہل کاروں نے ہوائی فائرنگ کر ڈالی۔

گزشتہ برس ایران میں جبری حجاب کی مہم کے آغاز کے بعد سے اخلاقی پولیس اور سکیورٹی اداروں نے خواتین کے خلاف اقدامات کو سخت کر دیا ہے۔ اس دوران حکام نے کم از کم 50 خواتین اور لڑکیوں کو گرفتار کیا جو سڑکوں پر کھڑے ہو کر جبری حجاب کے خلاف احتجاج کر رہی تھیں۔