لیبیا کی فوج کا پہلی مرتبہ سرت اور مصراتہ میں وفاقی حکومت کے ٹھکانوں پر حملہ

لیبیا میں قومی فوج کے طیاروں نے ہفتے کو علی الصبح دو شہروں سرت اور مصراتہ میں وفاق کی حکومت کے زیر انتظام ٹھکانوں کو نشانہ بنایا۔

العربیہ کے نمائندے کے مطابق مصراتہ میں وفاق کے عسکری اہداف پر 7 فضائی حملے کیے گئے۔ ان میں ترکی کی فضائیہ کا ڈرون کنٹرول روم، مصراتہ کے فوجی اڈے پر فضائی دفاعی نظام اور شہر میں ایوی ایشن کالج شامل ہے۔

رپورٹ کے مطابق یہ پہلا موقع ہے جب لیبیا کی قومی فوج نے مذکورہ دونوں شہروں میں وفاق کی ملیشیاؤں کے ٹھکانوں کو بم باری کا نشانہ بنایا ہے۔

اس دوران گولہ بارود کے گوداموں پر بھی بم باری کی اطلاعات ہیں۔

لیبیا کے مغربی شہر مصراتہ میں زور دار ھماکے سنے گئے جب کہ ترہونہ شہر کی فضاؤں میں وفاق کی حکومت کے ڈرون طیاروں کا گشت جاری رہا۔