.

یواے ای: کرونا وائرس کے 783 نئے کیسوں اور دو اموات کی تصدیق

پہلی اشاعت: آخری اپ ڈیٹ:

متحدہ عرب امارات میں کرونا وائرس سے متاثرہ کیسوں کی تعداد میں مسلسل اضافہ ہورہا ہے۔منگل کے روز وزارت صحت نے 783 نئے کیسوں کی تصدیق کی ہے اور اس مہلک وائرس کا شکار مزید دو افراد وفات پا گئے ہیں۔

یو اے ای میں کرونا وائرس کے کیسوں کی تعداد 19661 ہوگئی ہے اور اب تک 203 افراد وفات پاچکے ہیں۔

یو اے ای کی سرکاری خبررساں ایجنسی نے وزارتِ صحت کے حکام کے حوالے سے بتایا ہے کہ نئے کیسوں کا تعلق مختلف قومیتوں سے ہے۔

یو اے ای میں کرونا وائرس کو پھیلنے سے روکنے کے لیے عاید کردہ پابندیوں میں نرمی کے بعد سے نئے کیسوں کی تعداد میں مسلسل اضافہ ہورہا ہے۔

وزارتِ صحت کی ترجمان ڈاکٹر فریدہ الحسنی نے لوگوں پر زوردیا ہے کہ وہ شاپنگ مال اور ریستوران دوبارہ کھلنے کے باوجود حفاظتی احتیاطی تدابیر اختیار کریں۔ان کا کہنا ہے کہ رمضان میں عوام کی نقل وحرکت پر عاید پابندیوں میں جزوی طور پر نرمی کردی گئی ہے لیکن اس کے باوجود وہ سماجی فاصلہ اور صحت سے متعلق رہ نما ہدایات پر عمل کریں۔

یو اے ای نے جزوی طور پر لاک ڈاؤن اور کرفیو کی پابندیوں میں نرمی کی ہے لیکن اس کے ساتھ ہی ٹیسٹوں کی صلاحیت اور ان کے دائرہ کار میں اضافہ کردیا ہے۔وزارتِ صحت نے منگل کے روز ملک کے مختلف علاقوں میں 32 ہزار سے زیادہ افراد کے کرونا وائرس کے ٹیسٹ کیے ہیں اور ان میں سے نئے کیسوں کی تشخیص ہوئی ہے۔