یمن میں ایران کی حمایت یافتہ حوثی ملیشیا افریقی تارکینِ وطن کو سرکاری فوج اور عرب اتحاد کے خلاف لڑائی کے لیے فوجی تربیت دے رہی ہے اور انھیں امریکا اور اسرائیل کے خلاف نعرے بازی بھی سکھا رہی ہے۔
الحدث ٹی وی چینل نے ایک افریقی تارک وطن کی ویڈیو شیئر کی ہے۔اس میں اس کو ’’مرگ بر امریکا‘‘ اور ’’مرگ بر اسرائیل‘‘ کے نعرے لگاتے ہوئے سنا جاسکتا ہے۔
اس ویڈیو میں ایک حوثی جنگجو اور ایک تارک وطن نے مشین گنیں اٹھا رکھی ہیں اور وہ ایک پک اپ ٹرک کے پیچھے بیٹھے نظر آرہے ہیں۔
پہلے حوثی جنگجو یہ نعرے لگا رہا ہے:’’مرگ بر امریکا،مرگ بر اسرائیل ،یہود پر لعنت اور اسلام کی فتح۔‘‘اس کے بعد افریقی شخص یہ نعرے دُہرا رہا ہے۔
یمن کے وزیراطلاعات معمرالاریانی کے بہ قول حوثیوں نے سیکڑوں افریقی مہاجرین اور غیر قانونی تارکین وطن کو بین الاقوامی سطح پر تسلیم شدہ حکومت کے خلاف لڑائی کے لیے بھرتی کیا ہے۔
انھوں نے حوثی ملیشیا پر یہ بھی الزام عاید کیا تھا کہ اس نے غیرقانونی تارکینِ وطن کو یمن میں لڑائی کے علاوہ اشیاء کی اسمگلنگ کے لیے بھی بھرتی کیا ہے۔
ایران حوثی ملیشیا کو یمنی حکومت کے خلاف لڑائی کے لیے بیلسٹک میزائل ، ڈرونز اور دوسرے ہتھیار مہیا کررہا ہے۔
