.

عراق کے صوبہ کردستان کے بین الاقوامی ہوائی اڈے پر ڈرون حملہ

پہلی اشاعت: آخری اپ ڈیٹ:

عراق میں انسداد دہشت گردی حکام کا کہنا ہے کہ منگل اور بدھ کی درمیانی شب کردستان صوبے کے دارالحکومت اربیل میں قائم بین الاقوامی ہوائی اڈے پر ڈرون طیارے سے حملہ کیا گیا ہے۔

عراق کی سرکاری نیوز ایجنسی نے انسداد دہشت گردی حکام کے حوالے سے بتایا کہ امریکی قونصل خانے کے قریب واقع اربیل ہوائی اڈے پر بغیر پائلٹ کے بمبار ڈرون سے حملہ کیا گیا۔

آخری اطلاعات تک اس حملے میں کسی قسم کے جانی یا مالی نقصان کی اطلاع نہیں ملی۔ تاہم ہوائی اڈے کے قریب جھاڑیوں میں آگ لگ گئی تھی۔

عراق میں ’داعش‘ کے خلاف سرگرم عالمی اتحاد نے اربیل ہوائی اڈے پر ڈرون حملے کی تصدیق کرتے ہوئے کہا ہے کہ اس حملے میں کوئی جانی نقصان نہیں ہوا۔

درایں اثنا امریکی محکمہ دفاع پینٹاگان کا کہنا ہے کہ گذشتہ شب عراق کے صوبہ کردستان کے بین الاقوامی ہوائی اڈے پر نامعلوم افراد نے ڈرون حملہ کیا تھا تاہم اس حملے میں کوئی جانی نقصان نہیں ہوا۔

خبر رساں ادارے ’رائیٹرز‘ نے سیکیورٹی حکام کے حوالے سے بتایا کہ ڈرون سے اربیل ہوائی اڈے پر امریکی مرکز کو نشانہ بنایا گیا تھا۔

حکام کا کہنا ہے کہ حملے کے بعد کچھ دیر کے لیے فضائی سروس معطل کر دی گئی تھی تاہم بعد ازاں فلائٹ آپریشن بہ تدریج بحال کر دیا گیا۔