چین :ایک ارب سے زیادہ افراد کو کووِڈ-19ویکسین کی دونوں خوراکیں لگ چکیں

چین میں اب تک ایک ارب سے زیادہ افراد کو کرونا وائرس کی ویکسین کے دونوں ٹیکے لگائے جاچکے ہیں۔یہ تعداد اس کی کل آبادی کا 71 فی صد ہے۔

چین کے قومی صحت کمیشن کے ترجمان نے جمعرات کو ایک پریس بریفنگ میں بتایا کہ 15 ستمبر تک ملک بھر میں ویکسین کی دو ارب 16 کروڑ خوراکیں لگائی جا چکی ہیں۔

چین اپنے شہریوں کو اپنی ساختہ سائنوفارم اور سائنوویک ویکسینیں لگارہا ہے۔چین ہی میں 2019ء کے آخر میں سب سے پہلے کرونا وائرس کے مریضوں کی تشخیص ہوئی تھی اور اس کے شہر ووہان سے دنیا بھرمیں اس مہلک وائرس کی وبا پھیلی تھی۔چین اب تک اس مہلک وبا پر قریب قریب قابو پاچکا ہے جبکہ دوسرے ممالک اس سے نبردآزما ہیں۔