حوثی ملیشیا العبدیہ میں اجتماعی قتل عام کی مرتکب ہو رہی ہے: الاریانی

یمن کے وزیر اطلاعات ونشریات معمر الاریانی نے خبردار کیا ہے کہ مآرب گورنری کی العبیدیہ ڈاریکٹوریٹ میں ایرانی حمایت یافتہ حوثی ملیشیا کی پیش قدمی سے غیر مسبوق انسانی المیہ رونما ہوسکتا ہے۔

ٹوئٹر پر اپنی متعدد ٹویٹس میں الاریانی نے کہا کہ ہم حوثی ملیشیا کی طرف سے العبدیہ ڈاریکٹوریٹ میں شہری آبادی کے اجتماعی قتل عام پر خبردار کرتے ہیں۔ حوثی ملیشیا کی طرف سے العبدیہ پر چڑھائی سے علاقے میں غیر مسبوق انسانی المیہ رونما ہوسکتا ہے۔ العبدیہ کا علاقہ پہلے ہی حوثیوں کے محاصرے میں ہے باغی ملیشیا نے بین الاقوامی قوانین کی خلاف ورزی کرتے ہوئے شہریوں کے پر امن انخلا کے تمام راستے مسدود کر دیے ہیں۔

عالمی برادری اور اقوام متحدہ کی خاموشی

انہوں نے کہا کہ العبدیہ کی شہری آبادی پر حوثی ملیشیا کے جبر و تشدد اور ایک ماہ سے زاید عرصے سے جاری محاصرے پر عالمی برادری اور اقوام متحدہ کی خاموشی مجرمانہ اور ناقابل قبول ہے۔

انہوں نے کہا کہ حوثی ملیشیا بچوں، خواتین کو کھلے عام حملوں کا نشانہ بنا رہے ہیں۔ شہری آبادی پر بیلسٹک میزائل داغے جا رہے ہیں۔ ہاون میزائلوں سے حملے کیے جا رہے ہیں معصوم شہریوں کو مہلک ہتھیاروں سے نشانہ بنایا جا رہا ہے۔ حوثی ملیشیا کے یہ تمام اقدامات شہری آبادی کے اجتماعی قتل عام کی مذموم کوشش ہے۔