جنین میں اسرائیلی طاقت کا بے تحاشہ استعمال قابل مذمت ہے: گوٹریس

پہلی اشاعت: آخری اپ ڈیٹ:
مطالعہ موڈ چلائیں
100% Font Size
3 منٹس read

اقوام متحدہ کے سکریٹری جنرل گوٹریس نے مغربی کنارے میں جنین پناہ گزین کیمپ پر اسرائیل کی جانب سے طاقت کے بے تحاشہ استعمال کی شدید مذمت کی ہے۔ انہوں نے کہا فوجی آپریشن میں اسرائیلی طاقت کے بے تحاشہ استعمال قابل مذمت ہے۔

جینین پناہ گزین کیمپ پر اسرائیلی حملے کے اثرات پر بظاہر ناراض گوٹریس نے کہا کہ اس آپریشن میں 100 سے زائد شہری زخمی ہوئے۔ ہزاروں افراد کو نقل مکانی پر مجبور کیا گیا۔ سکولوں اور ہسپتالوں کو نقصان پہنچا اور پانی و بجلی کے نیٹ ورک میں خلل پیدا ہوگیا۔

انہوں نے زخمیوں کو طبی امداد پہنچانے میں رکاوٹ کھڑی کرنے اور انسانی ہمدردی کے کارکنوں کو ہر ضرورت مند تک پہنچنے سے روکنے پر بھی اسرائیل کو تنقید کا نشانہ بنایا۔

ایسوسی ایٹڈ پریس کے مطابق انہوں نے صحافیوں کو بتایا کہ میں شہریوں کے خلاف تشدد کی تمام کارروائیوں کی شدید مذمت کرتا ہوں۔ چاہے یہ دہشت گردانہ کارروائیاں ہوں۔

ان سے پوچھا گیا کہ کیا یہ مذمت اسرائیل پر لاگو ہوتی ہے تو انہوں نے جواب دیا کہ یہ ضرورت سے زیادہ طاقت کے استعمال پر لاگو ہوتا ہے۔ یہ واضح ہے کہ اس معاملے میں اسرائیلی افواج نے ضرورت سے زیادہ طاقت کا استعمال کیا ہے۔

یو این سیکرٹری جنرل نے اسرائیل سے ایک بار پھر مطالبہ کیا کہ وہ بین الاقوامی قانون کے تحت اپنی ذمہ داریوں کی تعمیل کرے۔ تحمل کا مظاہرہ کرے اور صرف متناسب طاقت کا استعمال کرے۔ انہوں نے مزید کہا کہ فضائی حملوں کا استعمال قانون نافذ کرنے والے آپریشنز کے انعقاد سے مطابقت نہیں رکھتا۔

گوٹریس نے اسرائیل کو یاد دلایا کہ قابض طاقت کے طور پر اس کی ذمہ داری ہے کہ وہ اس بات کو یقینی بنائے کہ شہری آبادی کو تشدد کی تمام کارروائیوں سے محفوظ رکھا جائے گا۔

یو این سکریٹری جنرل کی مذمت بدھ کے روز اقوام متحدہ کے انسانی حقوق کے تین آزاد ماہرین کے ایک بیان کے بعد سامنے آئی ہے۔ ماہرین نے اپنے بیان میں کہا کہ کہ اسرائیلی فضائی حملے اور زمینی کارروائیاں طاقت کے استعمال سے متعلق بین الاقوامی قانون اور اصولوں کی صریح خلاف ورزیوں کے مترادف ہیں۔ حالیہ اسرائیلی حملے جنگی جرم بن سکتے ہیں۔

یاد رہے جنین کیمپ پر پیر 3 جولائی کو شروع ہونے والے اسرائیلی دو روزہ حملے میں 12 فلسطینی شہید ہوگئے تھے۔

اسرائیلی حملے میں جنین کیمپ میں سڑکیں اور گلیاں تباہ ہوگئی ہیں۔ کیمپ کے 80 فیصد گھروں کو نقصان پہنچا ہے۔ بجلی کی لائنز کو بھی نقصان پہنچا ہے۔

مقبول خبریں اہم خبریں

مقبول خبریں