سعودی عرب میں یوکرین امن فارمولا مذاکرات ہو رہے ہیں: سربراہ زیلنسکی دفتر

پہلی اشاعت: آخری اپ ڈیٹ:
مطالعہ موڈ چلائیں
100% Font Size
3 منٹس read

یوکرین کے صدارتی دفتر کے سربراہ آندری یرماک نے تصدیق کی ہے کہ سعودی عرب اگست میں یوکرین کی صورتحال پر مذاکرات کی میزبانی کرے گا جس کے دوران امن منصوبے پر بات چیت متوقع ہے۔

اتوار کے روز یرماک نے ٹویٹ میں کہا ہم یوکرین امن فارمولے پر عمل درآمد کے حوالے سے قومی سلامتی کے مشیروں کے اگلے اجلاس کی تیاری کر رہے ہیں جو جلد ہی سعودی عرب میں ہوگا۔

این ایس اے کی پہلی میٹنگ جو ہم نے شروع کی تھی، جون میں کوپن ہیگن میں ہوئی تھی۔ اب ہم سعودی عرب میں ہونے والے مذاکرات میں مغرب اور گلوبل ساؤتھ دونوں سے زیادہ سے زیادہ شراکت داروں کو شامل کرنے کے لیے سخت محنت کر رہے ہیں۔ انہوں نے کہا میزبانوں اور شریک منتظمین کے لیے بہت شکریہ۔


وال سٹریٹ جرنل نے سب سے پہلے سربراہی اجلاس کے بارے میں رپورٹ کیا اور مذاکرات میں شامل سفارت کار کا حوالہ دیتے ہوئے کہا گیا کہ یہ مذاکرات 5 اور 6 اگست کو ہوں گے جس میں تقریباً 30 ممالک شرکت کریں گے۔ سربراہی اجلاس کی خبر امریکی قومی سلامتی کے مشیر جیک سلیوان کے جمعرات کو مملکت کے دورے کے بعد سامنے آئی ہے۔

ڈبلیو ایس جے کی رپورٹ میں بتایا گیا کہ مذاکرات جدہ میں ہوں گے لیکن برماک نے یہ نہیں بتایا کہ یہ ملاقات سعودی عرب میں کہاں ہو گی اور نہ ہی انہوں نے تاریخوں کی تصدیق کی۔

برماک نے ایک بیان میں کہا کہ یوکرین امن فارمولہ 10 بنیادی نکات پر مشتمل ہے جس پر عمل درآمد نہ صرف یوکرین کے لیے امن کو یقینی بنائے گا بلکہ دنیا میں مستقبل کے تنازعات کا مقابلہ کرنے کے لیے میکانزم بھی تشکیل دے گا۔

برماک نے کہا ہم اس بات پر گہرا یقین رکھتے ہیں کہ یوکرین کے امن منصوبے کو بنیاد کے طور پر لیا جانا چاہئے کیونکہ جنگ ہماری سرزمین پر ہو رہی ہے۔ برماک کے مطابق 10 نکات پر تقریباً ہفتہ وار بنیادوں پر 50 سے زائد ملکوں کے نمائندوں کے ساتھ انفرادی طور پر اور گروپس میں بات چیت کی گئی۔

اتوار کو بھی برماک نے ٹیلی گرام میسجنگ ایپ پر لکھا کہ یوکرین نیٹو میں شمولیت کے عمل کی تکمیل تک کیف کے لیے زیر التوا حفاظتی ضمانتوں کی فراہمی کے لیے اس ہفتے امریکہ کے ساتھ مشاورت شروع کرے گا۔

یاد رہے یہ بات چیت ترقی یافتہ ممالک کے جی 7 ملکوں کی طرف سے رواں ماہ لیتھوانیا میں نیٹو کے سربراہی اجلاس کے بعد جاری کردہ وعدوں کی پیروی میں کی جارہی ہے۔

مقبول خبریں اہم خبریں

مقبول خبریں