برطانوی پولیس نے کہا ہے کہ انہوں نے وسطی لندن کے لیسٹر سکوائر میں ایک 11 سالہ لڑکی اور ایک 34 سالہ خاتون پر چاقو سے وار کرنے والے ایک شخص کو گرفتار کرلیا ہے۔ یہ وہ علاقہ ہے جہاں عام طور پر بہت سے سیاح آتے ہیں۔
لندن پولیس نے اطلاع دی ہے کہ چاقو کے حملے میں زخمی ہونے والی لڑکی کو ہسپتال میں علاج کی ضرورت ہے لیکن اس کے زخم جان لیوا نہیں ہیں۔ دوسری خاتون کو معمولی زخم آئے ہیں۔
پولیس نے اس بات کی بھی تصدیق کی ہے کہ ابھی تک اس بات کا کوئی اشارہ نہیں ملا ہے کہ لیسٹر سکوائر میں چاقو مارنے کے واقعے کے دہشت گردانہ مقاصد ہیں۔ العربیہ کے نمائندے نے اطلاع دی ہے کہ اب تک کی معلومات سے پتہ چلتا ہے کہ چاقو مارنے کا واقعہ لیسسٹر سکوائر میں صبح 11:36 بجے کے قریب پیش آیا۔
اس سے قبل پولیس نے ویب سائٹ "X" پر ایک بیان میں کہا تھا کہ انہیں کسی اور پر شبہ نہیں ہے۔ وہ دو زخمی افراد کی حالت کے بارے میں اپ ڈیٹ کا انتظار کر رہے ہیں جنہیں ہسپتال لے جایا گیا تھا۔ چاقو سے حملہ ایک ایسے وقت میں ہوا ہے جب برطانیہ گزشتہ ہفتے ہونے والے تشدد کے بعد تناؤ کی کیفیت کا سامنا کر رہا ہے۔ یہ تناؤ اس وقت بڑھ گیا جب مہاجرین اور اسلام کے خلاف نعرے لگانے والے ہجوم کی پولیس سے جھڑپ ہوئی۔
