کابینہ اجلاس سے قبل غزہ کی سرحد پر شدید گولہ باری ، اسرائیلی ٹینک جمع ہوگئے

گزشتہ چند گھنٹوں میں اسرائیل نے غزہ سٹی پر اپنی گولہ باری تیز کر دی ہے۔ اسرائیلی فوج نے غزہ شہر کے مشرق میں زیتون اور الصبرہ کے علاقوں میں پورے رہائشی محلوں کو تباہ کر دیا۔ ان حملوں میں دھماکہ خیز ڈرون استعمال کیے گئے جو گھروں کے درمیان نصب کیے جاتے ہیں۔ غزہ کی پٹی میں طبی ذرائع نے بتایا کہ آج منگل کی صبح سے اسرائیل کی غزہ پر گولہ باری کے نتیجے میں 40 سے زائد فلسطینی شہید ہوگئے ہیں۔ "العربیہ" اور "الحدث" کے ایک رپورٹر نے وضاحت کی کہ گزشتہ 24 گھنٹوں کے دوران غزہ کی پٹی میں اسرائیلی حملوں میں کم از کم 100 فلسطینی جاں بحق ہوگئے ہیں۔

اسرائیلی کابینہ کے غزہ شہر پر کنٹرول کے فیصلے پر عمل درآمد کے اگلے قدم پر تبادلہ خیال کے لیے اجلاس سے چند گھنٹے قبل بڑی تعداد میں اسرائیلی ٹینک پٹی کی سرحد پر جمع ہوتے دیکھے گئے۔ اس سے قبل اسرائیلی وزیر اعظم نتن یاہو کے ترجمان نے اعلان کیا تھا کہ سلامتی کابینہ آج شام یروشلم میں ایک اجلاس منعقد کرے گی۔

اسی دوران اسرائیلی میڈیا نے بتایا کہ اجلاس میں غزہ سٹی پر قبضہ کرنے کے منصوبے پر تبادلہ خیال کیا جائے گا۔ جنگ بندی اور پٹی میں محفوظ کیے گئے افراد کی رہائی کے لیے مذاکرات دوبارہ شروع کرنے پر بھی بات ہوگی۔ اپنی طرف سے اسرائیلی محفوظ کیے گئے خاندانوں کے فورم نے سلامتی کابینہ کے اجلاس کے موقع پر آج احتجاج کی کال دی ہے۔

اقوام متحدہ نے زور دیا ہے کہ غزہ میں ناصر طبی ہسپتال پر گولہ باری کی اسرائیلی تحقیقات کے ٹھوس نتائج برآمد ہونے چاہئیں جس میں 20 افراد جاں بحق ہوئے جن میں پانچ صحافی بھی شامل تھے۔ انسانی امور کی رابطہ کاری کے دفتر کے ترجمان نے مزید کہا کہ اسرائیل نے ماضی میں بھی اسی طرح کے قتل کے واقعات کی تحقیقات کا اعلان کیا تھا لیکن ان سے کوئی احتسابی کارروائی نہیں ہوئی تھی۔

غزہ کی پٹی میں جنگ 7 اکتوبر 2023 کو حماس کی جانب سے اسرائیل پر حملے کے بعد شروع ہوئی تھی۔ حماس کے حملے میں 1,219 اسرائیلی ہلاک ہوگئے تھے۔ اسی روز سے اسرائیل نے غزہ پر تاریخ کی بدترین جارحیت شروع کردی تھی۔ لگ بھگ 23 ماہ کے دوران اسرائیلی فورسز نے 62744 ہزار سے زیادہ فلسطینیوں کو جاں بحق کردیا ہے۔