کولمبیا کی وزیرِ خارجہ نے امریکی محکمہ خارجہ کی طرف سے کولمبیا کے صدر گسٹاو پیٹرو کا ویزا منسوخ کرنے کے فیصلے کے خلاف احتجاج کرنے کے لیے اپنا امریکی ویزا "ترک کر دیا"، کولمبیا کی حکومت نے پیر کو کہا۔
وزیرِ خارجہ روزا ولاوی سینسیو کا یہ فیصلہ ایسے وقت میں سامنے آیا ہے جب دونوں ممالک کے درمیان منشیات کی پالیسی، غزہ جنگ اور ہمسایہ ملک وینزویلا میں امریکی بحریہ کی تشکیل جیسے مسائل پر کشیدگی بڑھ رہی ہے۔
کولمبیا کی وزارتِ خارجہ نے اس بارے میں سوالات کا جواب نہیں دیا کہ ولاوی سینسیو کے پاس کس قسم کا ویزا تھا لیکن ایک بیان میں کہا کہ وہ "اظہارِ رائے کو محدود کرنے والے سفارتی ویزوں" یا ملک کی "خودمختاری" کم کرنے میں دلچسپی نہیں رکھتیں۔
بعد ازاں پیر کو کولمبیا کے وزیرِ خزانہ جرمان ایویلا نے ایکس پر لکھا کہ وہ پیٹرو سے "یکجہتی" اور امریکہ کی ان کے خلاف "جارحیت" کی وجہ سے اپنا ویزا استعمال کرنا بند کر دیں گے۔ انہوں نے لکھا، "اپنے لوگوں کے لیے کام کرنے کے لیے ہمیں ویزا کی ضرورت نہیں ہے۔"
پیٹرو نے غزہ جنگ کے خلاف نیویارک میں ایک احتجاج میں شرکت کی اور مغربی کنارے اور غزہ کی پٹی کو آزاد کرنے کے لیے بین الاقوامی فوج بنانے کا مطالبہ کیا جس کے بعد امریکی محکمہ خارجہ نے جمعہ کو ان کا ویزا اس وقت منسوخ کر دیا۔
ایک میگا فون تھامے اور روایتی فلسطینی سکارف کوفیہ میں ملبوس پیٹرو نے امریکی فوجیوں سے صدر ڈونلڈ ٹرمپ کے احکامات پر "عمل نہ" کرنے کا مطالبہ کیا اور مزید کہا کہ وہ "اپنی رائفلوں کا رُخ انسانیت کی طرف مت کریں۔"
احتجاج کے چند گھنٹے بعد محکمہ خارجہ نے سوشل میڈیا پر کہا کہ "پیٹرو کے غیر ذمہ دارانہ اور اشتعال انگیز عمل کے باعث" وہ ان کا ویزا منسوخ کر دے گا۔
جب ویزے کا اعلان کیا گیا تو پیٹرو اقوامِ متحدہ کی جنرل اسمبلی میں شرکت کے لیے نیویارک میں کئی دن گذارنے کے بعد واپس کولمبیا پہنچ چکے تھے۔ انہوں نے ایکس پر لکھا کہ انہیں سزا کی "پرواہ نہیں" کیونکہ وہ اطالوی شہری بھی ہیں اور ممکنہ طور پر بغیر ویزا کے امریکہ جا سکتے ہیں۔
پیٹرو کے ویزے کی منسوخی بائیں بازو کے رہنما کے ٹرمپ انتظامیہ سے تعلقات میں ایک نئی مایوس کن صورتِ حال کی نشاندہی کرتی ہے جس نے اس ماہ کے شروع میں کولمبیا کو ان ممالک کی فہرست میں شامل کیا تھا جو اس کے مطابق منشیات کی سمگلنگ روکنے کے لیے اپنے بین الاقوامی وعدے پورے نہیں کر رہے۔
اٹلانٹک کونسل کے کولمبیا کے تجزیہ کار جیف رامسے نے کہا، وزیرِ خارجہ کے خود کو امریکہ جانے پر روک دینے کے فیصلے سے تعلقات میں مزید رکاوٹیں آئیں گی۔ جیسا کہ کولمبیا اگلے سال کانگریس اور صدارتی انتخابات میں حصہ لے رہا ہے تو اس سے پیٹرو انتظامیہ کے خود کو امریکی حکومت سے دور کرنے کی کوشش بھی ظاہر ہوتی ہے۔
رامسے نے کہا، "پیٹرو واشنگٹن سے تعلقات کو درست کرنے میں ذرا بھی دلچسپی نہیں رکھتے۔ ان کا واضح مقصد یہ ہے کہ ٹرمپ سے تصادم آئندہ انتخاب میں ان کے اتحاد کو فائدہ پہنچائے گا۔"
میامی کے ایک امیگریشن اٹارنی ڈیوڈ ہارٹ نے کہا، سیاحتی یا سفارتی ویزا کے حامل افراد کا اپنا سفری اجازت نامہ ترک کرنے کا عمل بہت کم دیکھا گیا ہے۔ جو لوگ امریکہ کا سفر نہیں کرنا چاہتے وہ بس اپنے ویزوں کی میعاد ختم ہونے دیں اور پھر ان کی تجدید نہ کریں۔
"وہ میڈیا کے لیے اور پیٹرو سے اظہارِ یکجہتی کے لیے ایسا کر رہی ہیں،" ہارٹ نے وزیر خارجہ کے اپنا ویزا ترک کرنے کی کوششوں کے بارے میں کہا۔
میامی کے ایک اور امیگریشن اٹارنی ولفریڈو ایلن نے کہا، اس نوعیت کا ویزا ترک کرنے کا کوئی باقاعدہ طریقہ کار نہیں ہے۔ کولمبیا کی وزیرِ خارجہ کو ممکنہ طور پر امریکی سفارت خانے کو ایک خط بھیجنا ہو گا جس میں ان کا سفری اجازت نامہ منسوخ کرنے کا مطالبہ ہو۔
انہوں نے کہا، "اگر آپ امریکہ کا سفر نہیں کرنا چاہتے ہیں تو آپ نہ آئیں۔ میں نے کبھی کسی کو نان امیگرنٹ ویزا ترک کرنے کے لیے وقت نکالتے نہیں دیکھا۔"
