پرنس ولیم نے نجی تصاویر شائع کرنے پر فرانسیسی میگزین کے خلاف مقدمہ جیت لیا

برطانیہ کے ولی عہد پرنس ولیم اور ان کی اہلیہ کیتھ نے فرانسیسی میگزین "پیرے ماتش" کے خلاف نجی تصاویر کی اشاعت پر دائر مقدمہ جیت لیا ہے۔ میگزین نے جمعرات کو جاری کیے گئے عدالتی نوٹس میں فیصلے کی تصدیق کی۔

میگزین نے اپنی اشاعت میں ان تصاویر کو شائع کیا تھا جو پیشہ ور فوٹوگرافروں نے شاہی جوڑے اور ان کے بچوں کی ایک خاندانی تعطیلات کے دوران لی تھیں۔

شاہی خاندان کے قریبی ذرائع کے مطابق ولیم جو بادشاہ چارلس کے سب سے بڑے بیٹے اور تخت کے وارث ہیں، اپنی فیملی کی نجی زندگی کے تحفظ کے حوالے سے ہمیشہ نہایت سخت موقف رکھتے ہیں، خصوصاً جب وہ کسی سرکاری ذمہ داری پر نہ ہوں۔

یہ دوسرا موقع ہے جب شہزادہ ولیم اور شہزادی کیتھ نے کسی فرانسیسی میگزین کے خلاف مقدمہ جیتا۔ اس سے قبل سنہ2012ء میں میگزین “کلوژر” نے کیتھ کی تصاویر شائع کی تھیں، جس پر عدالت نے شاہی جوڑے کے حق میں فیصلہ دیا تھا۔

"پیرے ماتش" کے خلاف یہ قانونی کارروائی رواں سال اپریل میں اس وقت شروع ہوئی جب میگزین نے شاہی خاندان کی تصاویر کو کوہ الپس میں ان کی نجی تعطیلات کے دوران شائع کیا۔

کینسنگٹن پیلس کے ترجمان نے کہا کہ "ویلز کے شہزادے اور شہزادی اپنے خاندانی وقت کے تحفظ کے لیے پرعزم ہیں اور چاہتے ہیں کہ ان کے بچے غیر ضروری مداخلت اور ذرائع ابلاغ کے دباؤ سے آزاد ماحول میں پروان چڑھیں"۔

خیال رہے کہ 43 سالہ پرنس ولیم میڈیا سے اپنی ناپسندیدگی کا اظہار کئی بار کر چکے ہیں۔ ان کی یہ تلخی اس وقت سے چلی آ رہی ہے جب ان کی والدہ شہزادی ڈیانا 1997ء میں پیرس میں ایک کار حادثے میں جاں بحق ہوئیں۔ وہ حادثہ اس وقت پیش آیا جب فوٹوگرافرز ان کا پیچھا کر رہے تھے۔

“پیرے ماتش” کی انتظامیہ نے فوری طور پر تبصرہ کرنے سے انکار کیا کہ تاہم میگزین نے عدالت کے فیصلے کے بعد اپنے نوٹس میں تسلیم کیا کہ اس کی اشاعت نے شاہی خاندان کی نجی زندگی کے احترام اور ان کے تصویری حقوق کی خلاف ورزی کی۔