جمعے کے روز کاروبار کے اختتام پر تیل کی قیمتوں میں تقریباً 4 فیصد کمی دیکھی گئی، جس کے باعث ہفتہ وار بنیادوں پر اسے نمایاں نقصان کا سامنا کرنا پڑا۔
رسد سے متعلق خدشات میں کمی کے بعد یہ گراوٹ سامنے آئی، کیونکہ آبنائے ہرمز میں پھنسے ہوئے مزید تیل بردار جہازوں کی روانگی شروع ہو گئی، اگرچہ سلطنتِ عمان کے قریب ایک مال بردار جہاز کو نشانہ بنایا گیا تھا۔
برینٹ خام تیل کے مستقبل کے معاہدے 3اعشاریہ27 ڈالر (4اعشاریہ34 فیصد) کمی کے بعد 71اعشاریہ99 ڈالر فی بیرل پر بند ہوئے، جبکہ امریکی ویسٹ ٹیکساس انٹرمیڈیٹ (WTI) خام تیل 2اعشاریہ69 ڈالر (3اعشاریہ74 فیصد) کمی کے بعد 69اعشاریہ23 ڈالر فی بیرل پر آگیا۔
گزشتہ جمعرات کی بندش کے بعد سے برینٹ خام تیل میں مجموعی طور پر 10اعشاریہ86 فیصد کمی ریکارڈ کی گئی، جبکہ ویسٹ ٹیکساس انٹرمیڈیٹ میں ہفتہ وار بنیادوں پر 9اعشاریہ62 فیصد کمی دیکھی گئی۔ گزشتہ جمعے کو مارکیٹ سرکاری تعطیل کے باعث بند رہی۔
برايس فیوچرز گروپ کے سینئر تجزیہ کار فِل فلین نے کہا ہے کہ یہ تاثر بڑھ رہا ہے کہ تیل کی ترسیل آبنائے ہرمز سے مسلسل جاری رہے گی۔
ان کے مطابق 60 روزہ جنگ بندی کے معاہدے سے قبل مارکیٹ میں یہ خدشہ موجود تھا کہ رسد طلب کو پورا نہیں کر سکے گی، تاہم اب یہ خدشات کمزور پڑتے جا رہے ہیں۔
پی وی ایم (PVM) کے تجزیہ کار تامس فارگا نے کہا کہ موجودہ رجحان یہی ظاہر کرتا ہے کہ جلد ہی رسد میں اضافی تیل کی صورتحال پیدا ہو سکتی ہے۔
فلین نے مزید کہا: ہم تیل کی بڑی مقدار میں فراہمی دیکھیں گے اور میرا خیال ہے کہ مصنوعات کی ایک بہت بڑی یلغار سامنے آئے گی۔
لندن اسٹاک ایکسچینج گروپ (LSEG) کے شپنگ ڈیٹا کے مطابق سعودی آئل کمپنی آرامکو نے جمعہ کے روز خلیج میں واقع راس تنورہ بندرگاہ سے تیل کی لوڈنگ دوبارہ شروع کر دی، جو تقریباً چار ماہ کی معطلی کے بعد بحال ہوئی ہے۔
اعداد و شمار کے مطابق سعودی شپنگ کمپنی بحری کے دو بڑے خام تیل بردار جہاز بھی راس تنورہ میں تیل کی لوڈنگ کے دوران دیکھے گئے۔ ان میں سے ہر جہاز کی گنجائش تقریباً 20 لاکھ بیرل خام تیل ہے۔
اسپارٹا کموڈیٹیز کی سینئر آئل مارکیٹ تجزیہ کار جون جوہ نے کہا کہ مارکیٹ میں عمومی فروخت کا رجحان ہے کیونکہ آبنائے ہرمز سے بڑھتی ہوئی ترسیلات پر ردعمل سامنے آ رہا ہے، جبکہ چین کی جانب سے ابھی تک خام تیل کی طلب میں اضافہ نہیں ہوا۔
کسی نامعلوم چیز کے لگنے سے جہاز کو نقصان
جمعرات کے روز برینٹ اور ویسٹ ٹیکساس انٹرمیڈیٹ خام تیل کی قیمتوں میں 2 فیصد سے زیادہ اضافہ ہوا، جب ایک نامعلوم چیز نے عمان کے قریب ایک جہاز کو نشانہ بنایا، جس کے بعد اقوام متحدہ کے بین الاقوامی میری ٹائم آرگنائزیشن (IMO) نے رضاکارانہ انخلا کا پروگرام معطل کر دیا۔
دو امریکی حکام نے رائٹرز کو بتایا کہ ایران نے آبنائے ہرمز سے گزرنے کی کوشش کے دوران ایک کارگو جہاز پر فائرنگ کی۔
ایرانی حکام کا کہنا ہے کہ آبنائے ہرمز میں طے شدہ راستوں سے ہٹ کر سفر کرنے والے جہازوں کی سلامتی کی ضمانت نہیں دی جا سکتی۔
اعداد و شمار کے مطابق، گزشتہ ہفتے آبنائے ہرمز کے ذریعے خام تیل کی ترسیل بڑھ کر جنگ کے آغاز کے بعد بلند ترین سطح پر پہنچ گئی، جو 28 فروری کو امریکی اور اسرائیلی حملوں سے شروع ہوئی تھی۔
اگرچہ جنگ بندی کے معاہدے کے بعد یہ بحری راستہ دوبارہ کھول دیا گیا ہے، تاہم مجموعی بحری آمدورفت اب بھی جنگ سے پہلے کی اوسط یومیہ سطح سے کافی کم ہے۔
روسی خبر رساں ایجنسی TASS کے مطابق روسی حکام کئی مہینوں کے لیے ڈیزل برآمدات پر پابندی عائد کرنے پر غور کر رہے ہیں۔روس ڈیزل کا ایک بڑا برآمد کنندہ ہے، تاہم یوکرین کی جانب سے ڈرون حملوں کے باعث تیل ریفائنریوں اور توانائی کے بنیادی ڈھانچے کو نقصان پہنچنے کے بعد اسے ایندھن کی سپلائی کے مسائل کا سامنا ہے۔
