واشنگٹن وال اسٹریٹ جرنل نے جمعہ کو ذرائع کے حوالے سے بتایا کہ ارب پتی ایلون مسک کی کمپنی سپیس ایکس نے سرمایہ کاروں کو مطلع کیا ہے کہ وہ سب سے پہلے چاند تک پہنچنے کو ترجیح دے گی اور مریخ کی جانب سفر بعد میں کرنے کی کوشش کرے گی۔
رپورٹ کے مطابق کمپنی کا ہدف مارچ 2027 ہے، جب وہ بغیر کسی انسان کے خلائی جہاز کے ذریعے چاند کی سطح پر پہنچنے کا تجربہ کرے گی۔یہ فیصلہ اس کے بعد آیا ہے کہ سپیس ایکس نے ایکس اے آئی (X.AI) کمپنی کو خریدنے پر اتفاق کیا، جو چیٹ بوٹ "گروک" تیار کرنے والی مصنوعی ذہانت کی کمپنی ہے۔
اس معاہدے کے تحت راکٹ اور سیٹلائٹ بنانے والی کمپنی کی مالیت تقریباً ایک ٹریلین ڈالر اور اے آئی کمپنی کی مالیت 250 ارب ڈالر تخمیناً ہے۔ سپیس ایکس نے ابھی تک رائٹرز کے تبصرے کی درخواست کا فوری جواب نہیں دیا۔
مسک نے گزشتہ سال کہا تھا کہ وہ 2026 کے آخر تک مریخ پر غیر انسانی مشن بھیجنے کا ارادہ رکھتے ہیں۔ سپیس ایکس اس وقت اگلی نسل کے سٹارشپ راکٹ کی تیاری کر رہی ہے، جو اسٹینلیس سٹیل سے بنایا گیا ہے، مکمل طور پر دوبارہ استعمال کے قابل ہوگا اور چاند و مریخ کے سفر سمیت مختلف مشنز کے لیے استعمال ہوگا۔
امریکہ اس دہائی میں چاند پر دوبارہ انسانی مشنز کے لیے چین کی بڑھتی ہوئی مقابلہ بازی کا سامنا کر رہا ہے، کیونکہ 1972 کے بعد کوئی انسان چاند پر نہیں پہنچا، جو امریکی پروگرام اپولو کی آخری انسانی مشن تھی۔
