دفاعی تعاون کے فروغ کے لیے پاکستانی فوجی دستے کی سعودی عرب آمد

سعودی وزارت دفاع نے دونوں برادر ممالک کے درمیان طے شدہ مشترکہ تزویراتی دفاعی معاہدے کے فریم ورک کے تحت شاہ عبدالعزیز ایئر بیس پر پاکستان سے ایک فوجی دستے کی آمد کا اعلان کیا ہے۔

وزارت دفاع نے واضح کیا کہ پاکستانی فورسز میں پاک فضائیہ کے لڑاکا اور معاون طیارے شامل ہیں، اس اقدام کا مقصد دونوں ممالک کی مسلح افواج کے درمیان عسکری ہم آہنگی کی سطح کو مزید بلند کرنا ہے۔

وزارت دفاع کی جانب سے ٹویٹ میں کہا گیا کہ وزارت برادر ممالک کے درمیان مشترکہ تزویراتی دفاعی معاہدے کے تحت مشرقی سیکٹر میں واقع شاہ عبدالعزیز ایئر بیس پر اسلامی جمہوریہ پاکستان سے ایک فوجی قوت کی آمد کا اعلان کرتی ہے۔

آپریشنل تیاریوں میں اضافہ

یہ عسکری تعاون دونوں ممالک کی جانب سے آپریشنل تیاریوں کی سطح کو بڑھانے اور تجربات کے تبادلے، مشترکہ پروگراموں اور مشقوں کے نفاذ کے ذریعے مشترکہ دفاعی صلاحیتوں کو ترقی دینے کی کوششوں کا حصہ ہے۔

وزارت دفاع نے اس بات پر زور دیا کہ یہ قدم علاقائی اور بین الاقوامی سطح پر امن و استحکام کی حمایت میں معاون ثابت ہوگا، ساتھ ہی یہ مملکت اور پاکستان کے درمیان گہرے تزویراتی تعلقات اور دفاعی و عسکری شعبوں میں جاری تعاون کا عکاس ہے۔