فرانسیسی انقلاب کو کامیابی سے ختم کرنے اور قونصل حکومت قائم کرنے کے تقریباً پانچ سال بعد نپولین بوناپارٹ نے دسمبر 1804 کے آغاز میں خود کو فرانس کا شہنشاہ قرار دے دیا۔ اس طرح پہلی فرانسیسی سلطنت کا آغاز ہوا۔
تاج پوشی کی تقریب کے دوران نپولین نے پرانی روایات سے ہٹ کر ایک نیا انداز اپنایا۔ اس نے پوپ کو اپنی تاج پوشی کی برکت کے لیے مدعو کیا، تاہم تاج اپنے ہاتھوں سے خود اپنے سر پر رکھا۔
فرانس کا شہنشاہ بننے کے تقریباً چھ ماہ بعد ہی نپولین نے ایک اور بڑا قدم اٹھایا اور میلان کیتھیڈرل پہنچ کر خود کو اٹلی کا بادشاہ بھی قرار دے دیا، جس پر یورپی طاقتیں حیرت زدہ رہ گئیں۔
تاجِ لومباردیا کا لوہے سے بنا ہوا تاج
نپولین بوناپارٹ نے اپنی تاجپوشی کے لیے جس چیز پر انحصار کیا وہ نام نہاد ''تاجِ لومباردیا کا لوہے سے بنا ہوا تاج ''تھا، جو یورپ کے قدیم ترین شاہی علامات میں شمار ہوتا ہے۔
تحقیقات کے مطابق جو اس تاج پر بیسویں صدی کے آخر میں کی گئیں، اس کے کچھ حصے پانچویں اور چھٹی صدی عیسوی کے درمیان بنائے گئے تھے، جبکہ دیگر حصے ساتویں صدی کے آخر سے دسویں صدی کے درمیان کے ہیں۔
یہ اس بات کی طرف اشارہ کرتا ہے کہ اس تاج میں وقت کے ساتھ کئی تبدیلیاں اور مرمتیں کی گئیں۔
دوسری طرف اس کے نقش و نگار اور ڈیزائن سے ظاہر ہوتا ہے کہ اسے رومی اور بازنطینی ماہر کاریگروں نے تیار کیا تھا۔اس تاج کے بارے میں کچھ روایات اور افواہیں بھی پائی جاتی ہیں، جن کے مطابق مبینہ طور پر اسے حضرت عیسیٰ علیہ السلام کے حقیقی صلیب کے ایک کیل کو پگھلا کر بنایا گیا اور اسے مقدس بنا دیا گیا۔
تاریخی طور پر یہ تاج کئی تاجپوشی کی تقریبات میں استعمال ہوا، خاص طور پر مقدس رومی سلطنت کے بادشاہوں کے لیے جو اٹلی کے بادشاہ بھی کہلاتے تھے، جیسے اوٹو سوم (996)، کونراڈ دوم (1026)، فریڈرک باربروسا (1155)، اور چارلس پنجم (1550)۔
اٹلی کا بادشاہ
کئی سال بعد نپولین بوناپارٹ نے تاجِ لومباردیا کے لوہے سے بنے تاج کو دوبارہ استعمال کرنے میں کوئی ہچکچاہٹ محسوس نہیں کی۔
اٹھارویں صدی کے آخر سے اپنی فوجی فتوحات کے بعد وہ شمالی اٹلی کے بڑے حصے پر غالب آ چکا تھا۔ اپنی کامیابیوں کو مستقل شکل دینے کے لیے 1805 میں اس نے ''جمہوریہ اٹلی'' کو ایک بادشاہت میں تبدیل کر دیا جو اس کے زیرِ اثر تھی۔
26 مئی 1805 کو میلان کے گرجا گھر میں نپولین نے خود کو اٹلی کا بادشاہ قرار دیا۔
تقریب کے دوران اس نے خود اپنے ہاتھوں سے تاجِ لومباردیا اپنے سر پر رکھا اور یہ الفاظ ادا کیے: ''خدا نے مجھے یہ عطا کیا ہے، جو اسے چھوئے گا اس پر تباہی آئے گی ''۔
فرانس کے شہنشاہ کی تاجپوشی کے برعکس اس بار میلانو کی تقریب میں پوپ شریک نہیں ہوا۔
اس کی وجہ نپولین اور پوپ کے درمیان بڑھتی ہوئی کشیدگی اور آسٹریا کے ساتھ نئے تنازع سے بچنے کی خواہش تھی۔
اس اقدام نے یورپ میں شدید غصہ اور تشویش پیدا کی۔ نپولین کا مقصد اٹلی پر اپنی گرفت مضبوط کرنا، شمالی اٹلی میں آسٹریا کے خلاف ایک مضبوط خطہ قائم کرنا، اور اطالوی نوجوانوں کو اپنی فوج میں شامل کر کے اپنی طاقت بڑھانا تھا۔
