ایک امریکی ذریعے نے "العربیہ" چینل پر انکشاف کیا ہے کہ لبنان اور اسرائیل کا اجلاس جنوبی لبنان سے اسرائیلی انخلا کی وجہ سے بند گلی میں پہنچ گیا ہے۔ امریکی ذریعے نے اس بات کی تصدیق کی ہے کہ لبنانی فریق اسرائیلی انخلا کے لیے ایک واضح ٹائم فریم کا مطالبہ کر رہا ہے اور واشنگٹن ایک ایسے معاہدے کے لیے دباؤ ڈال رہا ہے جس میں جنوبی لبنان سے اسرائیل کا مرحلہ وار انخلا شامل ہو۔
اعلیٰ اسرائیلی اور لبنانی حکام نے جمعرات کو جنوبی لبنان کے بفر زون سے کسی بھی اسرائیلی انخلا کی تردید کی ہے۔ یہ تردید ایک امریکی اہلکار کے اس اعلان کے بعد سامنے آئی جس میں کہا گیا تھا کہ اسرائیل نے لبنانی حکومت کی طرف خیر سگالی کے جذبے کے طور پر خطے سے اپنی کچھ افواج کو واپس بلا لیا ہے۔ ایک اسرائیلی اہلکار نے جمعرات کو کہا کہ تل ابیب جنوبی لبنان سے اپنی افواج اسی وقت واپس بلائے گا جب حزب اللہ کو غیر مسلح کر دیا جائے گا
۔
اسرائیلی حکومت کے ترجمان ڈیوڈ مینسر نے صحافیوں کو بریفنگ کے دوران کہا کہ ہم جنوبی لبنان سے اپنی افواج اس وقت تک واپس نہیں بلائیں گے جب تک حزب اللہ ایک خطرہ بنی رہے گی۔ اسے غیر مسلح نہیں کیا جاتا اور اس کی فوجی صلاحیتوں کو ختم نہیں کیا جاتا۔
اسرائیل اور لبنان امریکہ کی حمایت یافتہ ایک ایسی تجویز پر بحث کر رہے ہیں جس کے تحت اسرائیلی افواج لبنانی سرزمین کا وہ حصہ لبنانی فوج کے حوالے کر دیں گی جس پر اس نے حزب اللہ کے ساتھ جنگ کے دوران قبضہ کیا تھا تاکہ لبنان مقبوضہ علاقوں پر دوبارہ کنٹرول حاصل کرنے کی طرف قدم بڑھا سکے۔ "تجرباتی زون" قائم کرنے کی تجویز واشنگٹن میں لبنان اور اسرائیل کے درمیان ہونے والے مذاکرات کے تازہ ترین دور کا حصہ ہے۔ اس کی رفتار میں اس وقت کمی آئی جب ایران نے لبنانی معاملے کو امریکہ کے ساتھ اپنے مذاکرات میں شامل کرنے کی کوشش کی۔
امریکہ اور ایران نے گزشتہ ہفتے ایک عبوری معاہدے پر دستخط کیے جس کے تحت لبنان سمیت تمام محاذوں پر معاندانہ کارروائیاں ختم ہو جائیں گی۔ دونوں نے لبنان کی خودمختاری اور علاقائی سالمیت کی ضمانت دینے کا عہد کیا جس کا مطلب تہران کے لیے یہ ہے کہ اسرائیلی افواج کا جنوبی لبنان سے انخلا ضروری ہے۔
