سعودی عرب میں سمندری آلودگی کی نگرانی کے لیے سمارٹ بوائیز کا منصوبہ مکمل

سعودی عرب میں ماحول سے متعلق تعمیل کی نگرانی کے قومی مرکز نے بحیرہ احمر اور خلیج فارس کے ساحلوں کے 3500 کلومیٹر کے طول پر سمندری اور ساحلی آلودگی کی نگرانی کے سمارٹ بوائیز منصوبے کی تکمیل کا بتایا ہے۔

یہ بوائیز ( پانی پر تیرنے والے آلات) خود ہر گھنٹے مملکت کے ساحلوں میں سمندری ماحولیاتی اشاریوں کی صورتحال کے تجزیات پر مشتمل پیغامات بھیجتے ہیں۔ سمارٹ بوائیز ساحلی سیاحت اور مچھلیوں کی دولت پر سمندری و ساحلی آلودگی کے اثرات کے معاشی نتائج سے متعلق اشاریے فراہم کرتے ہیں تاکہ فوری اشاریوں کے مطابق ترقی کی ضروریات اور قدرتی وسائل کے تحفظ کے درمیان توازن کے حصول کو یقینی بنایا جا سکے جو فوری ردعمل اور مناسب فیصلے کرنے کی ضمانت دیتے ہیں۔

مرکز میں مانیٹرنگ نیٹ ورک ڈائریکٹوریٹ کے ڈائریکٹر انجینئر عامر بامنیف نے وضاحت کی کہ سمارٹ بوائیز کی تنصیب کے لیے 35 سائٹس کا انتخاب کیا گیا تھا۔ ان مقامات کا انتخاب کرتے وقت اس بات کا خیال رکھا گیا کہ وہ بحری جہاز رانی کی راہداریوں پر اثر انداز نہ ہوں۔

انہوں نے مزید بتایا کہ یہ بوائیز 24 گھنٹے لمحہ بہ لمحہ ماحولیاتی ڈیٹا جمع کرنے کے لیے مرکزی مانیٹرنگ سٹیشنز کے طور پر کام کرتے ہیں اور انہیں مرکزی روم میں بھیجتے ہیں جس سے سمندری ماحول کے عناصر میں کسی بھی غیر معمولی تبدیلی کی ابتدائی نشاندہی کی صلاحیتوں میں اضافہ ہوتا ہے۔

فوری ردعمل کی معاونت

سمارٹ بوائیز ہر گھنٹے مملکت کے ساحلوں میں سمندری ماحولیاتی اشاریوں کی 20 ہزار سے زیادہ پیغامات اور تجزیے بھیجتے ہیں جو روزانہ نصف ملین سے زیادہ ٹیکسٹس اور تجزیوں سے تجاوز کر جاتے ہیں جنہیں پروسیسنگ اور غیر معمولی تبدیلیوں کے رونما ہوتے ہی ان کی نگرانی کے لیے براہ راست مرکزی روم میں منتقل کیا جاتا ہے۔ اس سے فوری ردعمل اور مناسب ماحولیاتی و فنی فیصلے کرنے میں مدد ملتی ہے۔

آلودگی کے اشاریوں کی نگرانی

ماحولیاتی تعمیل کے ادارے میں مانیٹرنگ نیٹ ورک ڈائریکٹوریٹ کے ڈائریکٹر نے مزید بتایا کہ یہ منصوبہ ماحولیاتی اور فنی معیار کے مطابق آلودگی کے اشاریوں کی نگرانی کرتا ہے جن میں سب سے اہم ان علاقوں کا احاطہ کرنا ہے جہاں بحری جہاز رانی کی شدید آمد و رفت ہوتی ہے۔

خاص طور پر بندرگاہوں، صنعتی اخراج کے مقامات اور ساحلی حساس تنصیبات کے قریب کے مقامات کی نگرانی کی جاتی ہے۔ اس کے ساتھ ساتھ متنوع اور جامع ڈیٹا کے حصول کو یقینی بنانے کے لیے مختلف سمندری ماحول کے زیادہ سے زیادہ حصے کا احاطہ کیا جاتا ہے۔

جامع ٹیکنالوجیز

عامر بامنیف نے نشاندہی کی کہ سمندری ماحول کی نگرانی کے لیے مرکز کا نظام جامع ٹیکنالوجیز پر منحصر ہے جو سیٹلائٹ کے ذریعے سمندری اشاریوں کی نگرانی سے شروع ہوتا ہے، پھر ڈرونز کے ذریعے تھرمل کیمروں کا استعمال کرتے ہوئے اس کی فیلڈ تصدیق کی جاتی ہے اور سمارٹ بوائیز تک پہنچتا ہے جو حیاتیاتی عناصر کی پیمائش کرتے ہیں اور فوراً ڈیٹا مرکزی روم میں بھیجتے ہیں۔ اس کے بعد لیبارٹری ٹیسٹوں کے ذریعے میدانی تصدیق کا عمل مکمل کیا جاتا ہے۔