.

سعودی مذہبی پولیس کا قومی دن پر گانے بجانے اور بھنگڑے پر انتباہ

خلاف ورزی کرنے والوں کو انضباطی کارروائی کا سامنا کرنا پڑے گا

پہلی اشاعت: آخری اپ ڈیٹ:

سعودی عرب کی مذہبی پولیس نے آج سوموار کو مملکت کے قومی دن کے موقع پر عوامی مقامات پر لوگوں کو گانے بجانے اور ڈانس پر انتباہ کیا ہے۔

سعودی عرب کے محکمہ امر بالمعروف اور نہی عن المنکر المعروف مذہبی پولیس کے ترجمان ترکی الشلیل نے ایک بیان میں کہا ہے کہ اس انتباہ کی خلاف ورزی کرنے والوں کو انضباطی کارروائی کا سامنا کرنا پڑے گا۔

سعودی مملکت کے تراسویں یوم تاسیس کے موقع پر جشن کا سماں ہے اور ملک بھر میں یہ قومی دن بڑے جوش وخروش سے منایا جارہا ہے۔ دارالحکومت ریاض میں اس سلسلے میں سات مقررہ مقامات پر تقاریب منعقد کی جارہی ہیں اور رات کو آتش بازی کا خوبصورت مظاہرہ متوقع تھا۔

مکہ مکرمہ میں 190 سے زیادہ ثقافتی اور مذہبی تقاریب منعقد کی جارہی ہیں۔ جدہ میں قومی دن کو مختلف انداز میں منایا جارہا ہے اور وہاں چھاتہ برداروں کی ٹیم اپنے فن کا مظاہرہ کرے گی۔ اس مظاہرے کو دیکھنے کے لیے لوگوں کی بڑی تعداد میں آمد کی توقع کی جارہی ہے۔