عراق: نامعلوم طیاروں کی داعش کے ٹھکانوں پر بمباری

عراق کے شمالی شہر القائم میں نامعلوم جنگی طیاروں نے دولت اسلامی عراق وشام (داعش) کے ٹھکانوں پر بمباری کی ہے۔

عراق کے ایک ٹیلی ویژن چینل کی اطلاع کے مطابق امریکی جیٹ طیاروں نے یہ بمباری کی ہے جبکہ وائٹ ہاؤس نے عراق میں امریکی طیاروں کے کسی فضائی حملے کی تردید کی ہے۔

قبائلی ذرائع نے العربیہ نیوز کو بتایا ہے کہ شام کے جنگی طیاروں نے عراق کے علاقے میں یہ فضائی حملہ کیا ہے۔اس فضائی بمباری میں ہلاک اور زخمی ہونے والوں کے بارے میں فوری طور پر کوئی اطلاع نہیں ہے۔

العربیہ نیوز کے نمائندے نے یہ بھی اطلاع دی ہے کہ عراقی وزیراعظم نوری المالکی کے تحت فضائیہ نے بغداد سے دو سوکلومیٹر شمال میں واقع شہر بیجی پر بمباری کی ہے۔داعش کے جنگجوؤں نے گذشتہ ہفتے سے شہر میں واقع تیل صاف کرنے کے کارخانے پر قبضہ کررکھا ہے۔

ادھر تہران میں متعین عراقی سفیر محمد مجید الشیخ نے کہا ہے کہ ان کی حکومت نے ایران سے سنی جنگجوؤں کے خلاف مدد کے لیے نہیں کہا ہے۔انھوں نے یہ بیان ایرانی لیڈروں کی جانب سے عراق کو سنی جنگجوؤں کی مزاحمت کو کچلنے کے لیے مدد کی پے درپے پیش کشوں کے بعد جاری کیا ہے۔

درایں اثناء اقوام متحدہ نے ایک رپورٹ میں بتایا ہے کہ عراق میں رواں ماہ تشدد کے واقعات میں ایک ہزار سے زیادہ افراد مارے جاچکے ہیں۔ان میں زیادہ تعداد عام شہریوں کی ہے۔دسمبر 2011ء میں امریکی فوج کے عراق سے انخلاء کے بعد ایک ماہ میں یہ سب سے زیادہ ہلاکتیں ہیں۔