شام میں فوجی ہیلی کاپٹر راکٹ حملے میں تباہ

شام میں صدر بشار الاسد کے خلاف سرگرم عسکری گروپ "فیلق الشام" کی جانب سے ادلب کے ابو ظہور ہوائی اڈے کے قریب سرکاری فوج کے ایک ہیلی کاپٹر کو "کورنیٹ" طیارہ شکن میزائل کی مدد سے نشانہ بنایا گیا جس کے نتیجے میں ہیلی کاپٹر مکمل طور پر تباہ ہو گیا۔ تنظیم کی جانب سے ہیلی کاپٹر پر حملے اور اس کی تباہی کی ایک ویڈیو بھی جاری کی ہے۔

العربیہ ڈاٹ نیٹ کے مطابق ویڈیو میں ادلب کے ایک ہوائی اڈے کی فضاء میں موجود ایک جنگی ہیلی کاپٹر کو دکھایا گیا ہے۔ اگلے ہی لمحے ایک راکٹ ہیلی کاپٹر سے ٹکراتا ہے جس کے بعد ہیلی کاپٹر عمودی شکل میں زمین کی طرف آتا ہے۔ ہیلی کاپٹر کے زمین پر اترتے ہی وہاں پر موجود دو گاڑیوں میں فوجیوں کو وہاں سے دور لے جایا جاتا ہے اور اس کے ساتھ ہی ہیلی کاپٹر میں دھماکے کے بعد دھوئیں کے بادل اور آگ کے شعلے بلند ہوتے دکھائی دیتے ہیں۔