سعودی عرب : قطیف میں دہشت گردی کے 3 مجرموں کو سزائے موت

ریاض میں فوجداری سے متعلق خصوصی عدالت نے بدھ کے روز قطیف میں دہشت گردی کے مجرم ٹھہرائے جانے والے تین افراد کے خلاف تعزیرات کے تحت ابتدائی طور پر سزائے موت کا فیصلہ جاری کیا ہے جب کہ چوتھے شخص کو 12 سال قید کی سزا دی گئی ہے۔

سعودی عرب کے مشرقی شہر قطیف میں ایک شدت پسند گروپ میں شامل تین مجرموں پر متعدد الزامات عائد کیے گئے۔ ان میں حکمراں کے خلاف مسلح ہو کر باہر نکلنا ، سکیورٹی گشت پر مامور سکیورٹی اہل کاروں پر بھاری ہتھیاروں سے فائرنگ کے متعدد واقعات میں شرکت اور جیل کی عمارت پر فائرنگ کرنا شامل ہے۔

علاوہ ازیں عدالت نے تینوں ملزمان کو خودکار اسلحے کی اسمگلنگ اور ہتھیار استعمال کرنے کی تربیت حاصل کرنے کے سلسلے میں بھی مجرم قرار دیا ہے۔