منتخب ہو کر غرب اردن کی یہودی بستیوں کو اسرائیل میں ضم کر دوں گا: یاہو

اسرائیلی وزیراعظم بنجمن نیتن یاہو نے حالیہ انتخاب میں کامیابی کی صورت میں غرب اردن کے علاقے میں قائم یہودی بستیوں کو اسرائیل میں شامل کرنے کا اعلان کیا ہے۔

اسرائیلی چینل 12 کے مطابق ان خیالات کا اظہار اسرائیلی وزیر اعظم بینجمن نیتن یاہو نے ایک انتخابی جلسے سے خطاب کرتے ہوئے کیا۔ ان کا کہنا تھا کہ انتخابات میں کامیابی اور حکومت قائم کرنے کی صورت میں ان کی حکومت پہلی فرصت میں مقبوضہ غرب اردن کے علاقے میں موجود یہودی بستیوں کو اسرائیل کا حصہ قرار دے دی گی۔

یاد رہے کہ اسرائیل میں انتخابات 9 اپریل کو منعقد ہو رہے ہیں اور کرپشن الزامات میں پھنسے وزیراعظم نیتن یاہو کے پاس دوسری بار منصب سنبھالنے کے لیے کارکردگی نام کی کوئی چیز نہیں اس لیے وہ مسلمان دشمن عزائم کا اظہار کر کے یہودی ووٹرز کو متوجہ کرنے کی کوشش کر رہے ہیں۔

بعد ازاں چینل 12 سے گفتگو میں بھی نیتن یاہو کا کہنا تھا کہ وہ اسرائیل کی حاکمیت برقرار رکھنے کے لیے ہر اقدام اٹھائیں گے۔ جیسے جیسے انتخابات قریب آرہے ہیں فلسطینی بستیوں پر قابض اسرائیلی فوج کے حملوں میں بھی اضافہ ہوتا جا رہا ہے۔