سعودی عرب : جازان میں موسلا دھار بارشیں ، چٹان کے تودے گرنے سے راستہ بند

سعودی عرب کے جنوب مغربی علاقوں میں بدھ کے روز ہونے والی موسلا دھار بارشوں کے سبب جازان میں فیفاء کے راستے پر چٹان کے تودے آ گرے جس کے نتیجے میں مذکورہ راستہ بند ہو گیا۔ شہری دفاع کی ٹیمیں اور بلدیہ کے اہل کار اس وقت تودوں کو ہٹانے اور راستے کو دوبارہ سے کھولنے کے لیے کام میں مصروف ہیں۔

فیفاء کے بالائی علاقوں میں مسلسل تیسرے روز ہونے والی شدید بارشوں کے سبب متعدد زرعی مقامات برباد ہو گئے۔

جازان صوبے کے سرکاری ترجمان عادل بن احمد الزائری کے مطابق جازان کے نائب گورنر نے تمام متعلقہ اداروں کو ہدایات جاری کی ہیں کہ وہ موسلا دھار بارشوں کے سبب بند ہونے والے راستوں کو کھولنے کے لیے فوری طور پر اقدامات کریں۔ ان ہدایات پر عمل کرتے ہوئے متعلقہ حکام فوری طور پر متاثرہ مقامات پر پہنچ گئے اور اس وقت راستوں کو کھولنے کے لیے ہنگامی طور پر کام جاری ہے۔ چٹان کے تودے گرنے کے نتیجے میں کسی قسم کا جانی نقصان نہیں ہوا۔