سعودی عرب پرحملے کے لیے تیار حوثیوں کا ڈرون طیارہ اڈے پر تباہ کر دیا گیا:ویڈیو

یمن میں آئینی حکومت کے دفاع کے لیے سرگرم عرب اتحادی فوج نے یمن کے شہر عمران سے سعودی عرب پر حوثی باغیوں کی طرف سے بمبار ڈرون سے حملے کی کوشش ناکام بنا دی۔ عرب اتحادی فوج نے ڈرون کو اڑائے جانے سے قبل اسے اس کے اڈے پر بمباری کر کےتباہ کر دیا۔

اتحادی فوج کی طرف سے ایک ویڈیو جاری کی گئی ہے جس میں فوجی کارروائی میں حوثی ملیشیا کے ڈرون کو اس کے اڈے پر ہی تباہ کیے جاتے دیکھا جا سکتا ہے۔

اتحادی فوج کا کہنا ہے وہ یمن کے ایرانی حمایت یافتہ حوثی باغیوں کی طرف سے سعودی پر جارحانہ حملوں کی روک تھام اور حوثیوں کی دہشت گردی کچلنے کے لیے ہمہ وقت مستعد اور تیار ہے۔ بیان میں کہا گیا ہے کہ گذشتہ روز حوثی ملیشیا نے عمران گورنری سے سعودی عرب پر بمبار ڈرون بھیجنے کی منصوبہ بندی کی تھی تاہم ڈرون طیارے کو اڑانے سے قبل ہی تباہ کر دیا گیا۔

بیان میں کہا گیا ہے کہ حوثی ملیشیا دہشت گردی کی کارروائیوں میں نہتے اور معصوم شہریوں کو نشانہ بنا رہی ہے جب کی عرب اتحاد حوثیوں کے خلاف فوجی کارروائیوں میں بین الاقوامی قوانین کے مطابق کام کررہی ہے۔

گذشتہ منگل کو حوثی ملیشیا نے سعودی عرب کے شہر خمیس مشیط پر ڈرون طیارے سے حملے کی کوشش کی تبی تاہم عرب اتحاد نے حوثی ملیشیا کا بمبار ڈرون تباہ کر دیا تھا۔