سعودی عرب میں پہلے 'نیوز ریڈیو' چینل کا آغاز

سعودی براڈ کاسٹنگ اتھارٹی آج اتوار کے روز سے مملکت میں پہلا اخباری ریڈیو چینل شروع کر رہا ہے۔ یہ اقدام ریڈیو کے عالمی دن 13 فروری کے موقع پر سامنے آیا ہے۔ یہ نیوز ریڈیو سعودی عرب میں اپنی نوعیت کا پہلا ریڈیو اسٹیشن ہو گا۔ مذکورہ ریڈیو سعودی عرب کے سرکاری چینل الاِخباریہ کی شاخ کے طور پر کام کرے گا۔

سعودی براڈ کاسٹنگ اتھارٹی کے چیف ایگزیکٹو محمد بن فہد الحارثی کے مطابق یہ اقدام معاشرے کے مختلف طبقوں کی خواہش پر عمل درامد کے سلسلے میں اتھارٹی کی حکمت عملی کا حصہ ہے۔

نئے نیوز ریڈیو کی نشریاتfm پر ابتدائی طور پر تین صوبوں میں نشر ہو گی۔ ان میں ریاض کی فریکوئینسی (93.00) ، جدہ کی (107.7) اور دمام کی (99.00) ہو گی۔

نیوز ریڈیو پر خبروں کے بلیٹن کے علاوہ مختلف موضوعات پر مشتمل نیوز رپورٹیں اور حالات حاضرہ سے متعلق پروگرام نشر کیے جائیں گے۔