سعودی پریس ایجنسی نے پیر کو اطلاع دی کہ ہفتے کے آخر میں مدینہ کی الحناکیہ گورنری کے شاہ عبدالعزیز محفوظ کردہ سبزہ زار میں سبز کاری کا ایک بڑا منصوبہ شروع کیا گیا۔
سرکاری اداروں اور انجمنوں کے نمائندوں نے مقامی لوگوں کے ساتھ مل کر بیج بکھیرنے اور جنگلی درخت لگانے کا کام کیا۔
یہ سرگرمی سعودی گرین انیشیٹو (ایس جی آئی) کا ایک حصہ ہے تاکہ مملکت میں سبزے کا رقبہ بحال اور جنگلات کی اہمیت کے بارے میں بیداری پیدا کی جائے اور صحرا زدگی اور زمینی کٹاؤ کا مقابلہ کرنے والی سبز جگہیں بنائیں۔
رپورٹ کے مطابق ایس جی آئی کا مقصد "ایک قدیم اور روایتی صحت مند ماحول کا تحفظ، ماحولیاتی آلودگی کو کم کرنا، صحرائی زمینوں کی بحالی اور علاقے میں سبزے کا رقبہ بڑھانا" ہے۔
نیشنل سینٹر فار ویجیٹیشن کور ڈیولپمنٹ اینڈ کمبیٹنگ ڈیزرٹیفیکیشن نے مدینہ ریجن کے حکام کے ساتھ مل کر اس سرگرمی کی سربراہی کی۔
مختلف پودوں کے بیج بونے کے علاوہ ببول کے جنگلی درختوں کی پنیری لگائی گئی۔
مملکت کے ولی عہد شہزادہ محمد بن سلمان نے مارچ 2021 میں سعودی گرین انیشیٹو کا آغاز کیا تھا۔
یہ سعودی ویژن 2030 منصوبے کی توسیع ہے جس کا مقصد معیشت کو متنوع بنانا، شہریوں کو بااختیار بنانا اور مقامی و بین الاقوامی سرمایہ کاروں کے لیے سازگار ماحول پیدا کرنا ہے۔
ایس جی آئی 2030 تک مملکت کی زمین اور سمندر کا 30 فیصد حصہ محفوظ کرنا چاہتا ہے اور این سی وی سی اس پروگرام کی سربراہی کے لیے بنایا گیا تھا۔
