اسرائیل اور ایران کے درمیان گزشتہ جمعے سے شروع ہونے والے تنازع کے درمیان باخبر اسرائیلی ذرائع نے دعویٰ کیا ہے کہ ایرانی فریق نے صورتحال کو ٹھنڈا کرنے کے لیے کچھ ثالثوں کا سہارا لیا ہے۔ یروشلم پوسٹ کے مطابق ذرائع نے بتایا کہ تہران نے سلطنت عمان اور قطر سے رابطہ کیا ہے اور ان سے کہا ہے کہ وہ اسرائیل کے جاری حملوں کو روکنے اور جوہری مذاکرات دوبارہ شروع کرنے کی کوشش میں واشنگٹن کے ساتھ ثالثی کریں۔ اپنی طرف سے قبرص کے صدر نیکوس کرسٹوڈولائڈس نے تصدیق کی ہے کہ ایران نے اپنے ملک سے اسرائیل کو پیغام پہنچانے کے لیے کہا۔ انہوں نے کہا کہ وہ آج اسرائیلی وزیر اعظم بنجمن نیتن یاہو سے بات کریں گے۔
جنگ کی توسیع
یہ اس وقت سامنے آیا ہے جب ایرانی وزیر خارجہ عباس عراقچی نے اتوار کے روز اعلان کیا تھا کہ اگر اسرائیل نے اپنے حملے بند نہیں کیے تو ان کا ملک جنگ کو وسعت دینے کے لیے تیار ہے۔ انہوں نے اپنے ملک پر اسرائیلی حملے کو ایرانی جوہری مسئلے پر ایرانی امریکی مذاکرات میں رکاوٹ ڈالنا قرار دیا۔
عباس عراقچی نے یہ بھی کہا کہ ان کا ملک ایک معاہدے پر دستخط کرنے کے لیے تیار ہے جس کا مقصد اس بات کو یقینی بنانا ہے کہ ان کا ملک جوہری ہتھیار نہیں رکھے گا۔ انہوں نے یہ بھی کہا کہ ایران ایسی شرائط کو قبول نہیں کرے گا جو پرامن مقاصد کے لیے جوہری توانائی تیار کرنے کے اس کے جائز حقوق کو محدود کر دیں۔ یہ بیانات امریکی صدر ڈونلڈ ٹرمپ کے اس اعلان کے فوراً بعد سامنے آئے ہیں کہ ایران اور اسرائیل کے درمیان معاہدہ طے پانا اور اس خونریز تنازعے کا خاتمہ ممکن ہے۔
اس کے برعکس اسرائیلی وزیر خارجہ گیڈون ساعر نے تصدیق کی ہے کہ ایران میں اسرائیلی فوج کی کارروائی جاری رہے گی۔ انہوں نے زور دیا کہ کہ ابھی بہت سے مقاصد حاصل کیے جا رہے ہیں۔ ایک سینئر امریکی اہلکار نے ہفتے کے روز واضح کیا ہے کہ واشنگٹن مذاکرات کے لیے پرعزم ہے اور امید ظاہر کی کہ ایرانی جلد ہی مذاکرات کی میز پر بیٹھیں گے۔
دریں اثنا تہران نے کہا ہے کہ امریکہ کے ساتھ مذاکرات فی الحال بے معنی ہیں۔ ایرانی وزارت خارجہ کے ترجمان ناصر کنعانی نے کہا ہے کہ جب تک صہیونی وجود اپنے حملے جاری رکھے گا، اس کے سب سے بڑے حامی اور ساتھی (امریکہ) کے ساتھ مذاکرات میں شرکت بے معنی ہے۔
