"اعتدال" اور "ٹیلی گرام" نے 3 ماہ کے دوران 2.8 کروڑ سے زیادہ انتہا پسند مواد ہٹا دیا

سعودی عرب میں انتہا پسندی کے انسداد کے عالمی مرکز "اعتدال" نے ٹیلی گرام ایپلی کیشن کے ساتھ سہ ماہی تعاون کے نتائج جاری کیے ہیں۔ اس کے تحت 2.84 کروڑ سے زائد انتہا پسند مواد کو ہٹایا گیا اور 1,150 چینل بند کیے گئے جو انتہا پسندی کی تشہیر کے لیے استعمال ہو رہے تھے۔ یہ اقدامات عالمی سطح پر ڈیجیٹل انتہا پسندی کے خلاف جدوجہد کا حصہ ہیں۔

اعتدال کے مطابق ڈیجیٹل انتہا پسندی کی سب سے زیادہ سرگرمی اگست میں ریکارڈ کی گئی جس کی شرح 42 فی صد تھی جب کہ جولائی میں 40 فی صد رہی اور ستمبر میں یہ 18 فی صد تک گر گئی۔ یہ اعداد و شمار نگرانی اور پیشگی اقدامات کی مؤثریت کو ظاہر کرتے ہیں۔

مرکز نے بتایا کہ فروری 2022 سے ستمبر 2025 تک اعتدال اور ٹیلی گرام کے تعاون کے نتیجے میں کل 23.6 کروڑ سے زائد مواد ہٹایا گیا۔ اس کے علاوہ 18,605 چینلز بند کیے گئے جو انتہا پسند اور اشتعال انگیز خیالات پھیلانے کے لیے استعمال ہو رہے تھے۔

یہ شراکت داری دنیا کی سب سے کامیاب کوششوں میں شمار کی جا رہی ہے، کیونکہ یہ مصنوعی ذہانت کی تکنیکوں کے ذریعے مواد کا تجزیہ کرتی ہے اور فوری طور پر ایسے اشتعال انگیز مواد کو ہٹانے کا عمل کرتی ہے جو ڈیجیٹل اور سماجی سلامتی کے لیے خطرہ بن سکتا ہے۔

"اعتدال" اپنے ریاض کے مرکز سے انتہا پسندی کے خلاف بین الاقوامی کوششیں جاری رکھے ہوئے ہے اور بڑی ٹیکنالوجی کمپنیوں کے ساتھ شراکت کے ذریعے معتدل بیانیہ کو فروغ دے رہا ہے۔ یہ سب اقدامات سعودی عرب کے وژن کے تحت کیے جا رہے ہیں تاکہ ڈیجیٹل دنیا کو زیادہ محفوظ بنایا جا سکے اور انتہا پسندی کے خلاف مضبوط مزاحمت قائم کی جا سکے۔