سعودی ولی عہد 18 نومبر کو واشنگٹن کا دورہ کریں گے : وائٹ ہاؤس

امریکی وائٹ ہاؤس کے مطابق سعودی ولی عہد اور وزیرِ اعظم شہزادہ محمد بن سلمان رواں ماہ 18 نومبر کو واشنگٹن کا دورہ کریں گے۔

دوسرا دورہ

یہ شہزادہ محمد کا امریکی دار الحکومت کا دوسرا دورہ ہو گا۔ اس سے قبل وہ 2018 میں اپنے پہلے سرکاری دورے پر واشنگٹن گئے تھے، یہ دورہ سعودی فرماں روا شاہ سلمان بن عبدالعزیز کی ہدایت پر کیا گیا تھا۔

یہ اعلان ایسے وقت میں سامنے آیا ہے جب سعودی وزیرِ خارجہ شہزادہ فیصل بن فرحان نے اتوار کے روز اپنے امریکی ہم منصب مارکو روبیو سے ٹیلیفون پر گفتگو کی۔

مکالمے میں دونوں ممالک کے درمیان دو طرفہ تعلقات اور خطے کی تازہ صورتِ حال پر تبادلہ خیال ہوا۔

مزید یہ کہ ان حالات کے حوالے سے جاری مشترکہ کوششوں پر بھی گفتگو ہوئی۔ یہ بات سعودی وزارتِ خارجہ کے بیان میں بتائی گئی۔

ٹرمپ کا پہلا بیرونی دورہ

یاد رہے کہ امریکی صدر ڈونلڈ ٹرمپ رواں سال مئی میں سعودی عرب پہنچے تھے۔ یہ ٹرمپ کی دوسری مدتِ صدارت کے آغاز کے بعد ان کا پہلا غیر ملکی دورہ تھا۔

ماہرین کے مطابق یہ دورہ اس بات کی علامت تھا کہ سعودی عرب اور خلیجی ممالک کی جیوپولیٹیکل اہمیت میں نمایاں اضافہ ہوا ہے۔ ایسا نہ صرف علاقائی استحکام میں کلیدی کردار کے باعث ہوا بلکہ اقتصادی وزن اور اصلاحاتی پالیسیوں نے بھی اہم کردار ادا کیا۔