جنوبی لبنان میں اسرائیل کے فضائی حملے … حزب اللہ کی رضوان فورس کو نشانہ بنانے کا اعلان

اسرائیلی لڑاکا طیاروں نے لبنان میں شمالی لیطانی کے علاقوں جمعہ کی صبح نشانہ بنایا، ان میں ریحان اور المحمودیہ کی پہاڑیوں کے علاوہ بیساریہ، قاقعیہ، تبنا، زراریہ اور انصار کے درمیان جنوبی لبنان کے علاقے شامل ہیں۔ یہ کارروائی اس وقت ہوئی جب مغربی بقاع کی وادی زلایا میں بھی فضائی حملے کیے گئے۔

بعد ازاں اسرائیلی فوج نے اعلان کیا کہ اس نے حزب اللہ کی رضوان فورس کے تربیتی کمپلیکس اور دیگر اہداف کو نشانہ بنایا ہے۔

اسرائیلی فوج کے بیان میں کہا گیا کہ فضائی حملوں کا ہدف وہ تربیتی اور استعداد بڑھانے والا کمپلیکس تھا جسے حزب اللہ کی رضوان فورس کے یونٹ نے اپنے عناصر کی تربیت اور تیاری کے لیے استعمال کیا۔

بیان میں مزید کہا گیا کہ ہفتے کے آغاز پر اسرائیلی فوج نے حزب اللہ کے ایک اور تربیتی کمپلیکس پر حملہ کیا تھا، جس میں یونٹ کے عناصر نے ہتھیاروں کی مختلف اقسام کے استعمال اور گولہ باری کی تربیت حاصل کی۔ اس کا مقصد دہشت گردانہ منصوبے بنانے اور ان پر عمل درآمد کی تیاری کرنا تھا۔

اس سے قبل اسرائیلی نشریاتی ادارے نے اطلاع دی تھی کہ ، اگر لبنانی حکومت اور فوج کے ذریعے حزب اللہ کے ہتھیار ختم کرنے کی کوششیں ناکام رہیں تو اسرائیلی فوج نے لبنان میں حزب اللہ کے اہداف پر وسیع پیمانے پر حملے کی منصوبہ بندی کی ہے ۔

چند روز پہلے اسرائیلی ٹی وی 'چینل 14' نے بتایا کہ حزب اللہ کو امریکی پیغام ملا، جس میں وساطت کے ذریعے حزب اللہ کے ہتھیار ختم کرنے کے لیے آخری مہلت 2026 کے آغاز میں دی گئی، ورنہ وسیع پیمانے پر اسرائیلی حملہ کیا جائے گا۔

کچھ دن پہلے اسرائیلی فوج نے جنوبی لبنان میں مرجعیون کے علاقے کے اطراف مشقیں کیں اور یارون کے جنوبی قصبے کے اطراف کو مشین گنوں سے نشانہ بنایا۔

لبنان کے سرکاری خبر رساں ادارے "نیشنل میڈیا ایجنسی" نے بتایا کہ اسرائیلی فوج نے یارون کے قصبے کو نشانہ بنایا اور حمامص میں قائم اپنے نئے مرکز سے مرجعیون کے سادہ علاقے کے اطراف پر مشین گنوں کے حملے کیے۔

اس کے علاوہ اسرائیلی جنگی طیاروں نے جنوبی لبنان کے نبطیہ اور التفاح کے علاقوں میں درمیانی بلندی پر مشقی فضائی حملے کیے، جس کی تصدیق مذکورہ ایجنسی نے کی۔

یاد رہے کہ اسرائیل اور لبنان کے درمیان جنگ بندی کا معاہدہ گذشتہ برس ہوا تھا جس کا نفاذ 27 نومبر 2024 سے شروع ہوا۔

واضح رہے کہ 28 نومبر 2024 سے 27 نومبر 2025 تک اسرائیلی فضائی حملوں کے نتیجے میں 335 افراد ہلاک اور 973 زخمی ہوئے۔