ایران بین الاقوامی قانون اور اچھی ہمسائیگی کے اصولوں کی مسلسل خلاف ورزی کر رہا ہے

سعودی کابینہ نے ولی عہد اور وزیر اعظم شہزادہ محمد بن سلمان کے زیر صدارت علاقائی اور بین الاقوامی واقعات کی پیش رفت کا جائزہ لینے کے بعد آبنائے ہرمز میں تجارتی جہازوں پر بار بار ایرانی جارحیت... اور کویت، بحرین، قطر، متحدہ عرب امارات، سلطنت عُمان اور اردن پر حملوں کی سخت ترین الفاظ میں مذمت کی ہے۔ ساتھ ہی خطے کی سکیورٹی کو غیر مستحکم کرنے والے ایران کے رویے، بین الاقوامی قانون کے اصولوں، اقوام متحدہ اور اسلامی تعاون تنظیم کے منشور اور اچھی ہمسائیگی کے اصولوں کی خلاف ورزیوں کو مکمل طور پر مسترد کرنے کا اعادہ کیا ہے۔

آج منگل کے روز اجلاس کے آغاز میں سعودی ولی عہد نے کابینہ کو امریکہ کے صدر ڈونلڈ ٹرمپ کی جانب سے موصول ہونے والی ٹیلی فون کال کے حوالے سے آگاہ کیا اور اس دوران دو طرفہ تعاون کے شعبوں، متعدد علاقائی اور بین الاقوامی امور کا جائزہ لیا گیا۔ ساتھ ہی خطے کی سکیورٹی اور استحکام کے حصول میں معاون ہر اقدام کی حمایت پر زور دیا گیا۔

جدہ میں منعقدہ اجلاس میں کابینہ نے ریاض میں سعودی اور عراقی فریقین کے درمیان ہونے والے اجلاس کے مندرجات کا خیر مقدم کیا۔ عراق کی جانب سے اپنی سرزمین اور فضائی حدود کو مملکت، خلیج تعاون کونسل کے ممالک اور خطے کے ممالک کو نشانہ بنانے والے کسی بھی عمل یا حملے کے لیے نقطہ آغاز کے طور پر استعمال ہونے کی اجازت نہ دینے کے عزم کا خیرمقدم کیا۔ علاوہ ازیں مشترکہ مفادات کے حصول کے لیے دو طرفہ رابطہ جاری رکھنے پر اتفاق کیا گیا۔

اسی دوران کابینہ نے امریکہ کے جانب سے 1979 میں شامل کیے گئے قانون "شامی عرب جمہوریہ کو دہشت گردی کی ریاستی سرپرست ملک قرار دینے" کو ختم کرنے کے طریقہ کار شروع کرنے کے اعلان کا خیرمقدم کیا۔ سعودی عرب کی طرف سے شامی حکومت کی جانب سے سکیورٹی اور استحکام کو مضبوط بنانے، ریاستی اداروں کی تعمیر اور اپنے عوام کی امنگوں کی تکمیل کی راہ میں اٹھائے جانے والے مثبت اقدامات کی حمایت کا اعادہ کیا۔

سعودی ولی عہد شہزادہ محمد بن سلمان نے کینیڈا کے وزیر اعظم مارک کارنی کے ساتھ اپنی بات چیت کے نتائج سے آگاہ کیا۔ اس میں مختلف سطحوں پر دو طرفہ تعلقات کو مستحکم کرنے اور اسے ترقی دینے کے عزم کا اعادہ کیا گیا، تاکہ مشترکہ تعاون کے ایک ایسے مستقبل تک پہنچا جا سکے جو باہمی اعتماد، گہری دوستی اور سعودی وژن 2030 اور کینیڈا کے ترقیاتی ایجنڈے سے نکلنے والے اہداف کے ذریعے تقویت یافتہ ہو، تاکہ دونوں ممالک کے لیے ایک مضبوط اور زیادہ لچک دار معیشت کی تعمیر کی جا سکے۔

اسی تناظر میں سعودی کابینہ نے کینیڈا کے وزیر اعظم کے سرکاری دورے کے دوران سعودی کینیڈین رابطہ کونسل کے قیام، توانائی، مصنوعی ذہانت میں سرمایہ کاری اور مہارتوں کی ترقی کے شعبوں میں مفاہمت کی یاد داشتوں پر دستخط کی تعریف کی۔ سعودی کینیڈین سرمایہ کاری فورم کی کامیابی اور کان کنی، انجینئرنگ، بنیادی ڈھانچہ، جدید صنعتوں، تربیت، تعلیم، مالیاتی خدمات اور انفارمیشن اینڈ کمیونیکیشن ٹیکنالوجی کے شعبوں میں دونوں ممالک کے سرکاری اداروں، کمپنیوں اور اداروں کے درمیان تجارتی اور سرمایہ کاری کے معاہدوں کے اعلان پر بھی تعریف کی۔

سعودی کابینہ نے ولی عہد شہزادہ محمد بن سلمان کے زیر صدارت ریاستی محصولات کے نظام کی منظوری دی اور بین الاقوامی تربیت حاصل کرنے والوں کو دیے جانے والے تربیتی ویزا کے اجرا کی بھی کئی ترتیبات کے مطابق منظوری دی۔