رولا زحالقہ اسرائیل کی تاریخ میں دوسری مسلمان خاتون شرعی جج مقرر

اسرائیل میں شرعی ججوں کی کمیٹی نے وکیل رولا زحالقہ کو شرعی عدالت میں جج تعینات کر دیا ہے، جس کے ساتھ ہی وہ اسرائیل کی شرعی عدالتوں کی تاریخ میں یہ منصب سنبھالنے والی دوسری خاتون بن گئی ہیں۔

وکیل رولا زحالقہ نے اسرائیلی صدر اسحاق ہرتسوگ کے ہیڈ کوارٹر میں منعقدہ حلف برداری کی تقریب کے دوران اسرائیل کے عرب شہریوں سے تعلق رکھنے والے چار دیگر نئے ججوں کے ساتھ اپنے عہدے کا حلف اٹھایا۔

رولا زحالقہ کی تعیناتی یروشلم کی شرعی عدالت کے لیے چار نئے ججوں کے گروپ میں کی گئی ہے، یہ تقرری تقریب تقرری کمیٹی کے تقریباً دس برس تک فعال نہ رہنے کے بعد عمل میں آئی ہے۔

اسرائیل میں شرعی عدالت مسلمانوں کے عائلی قوانین، میراث اور اوقاف کے مقدمات کی سماعت کرتی ہے۔

وکیل رولا زحالقہ کا تعلق اسرائیل کے عرب شہریوں سے ہے اور ان کا آبائی تعلق کفر قرع کے زحالقہ خاندان سے ہے جو یروشلم سے تقریباً 115 کلومیٹر دور واقع ہے۔