خلیج تعاون کونسل (جی سی سی) کے سیکرٹری جنرل جاسم البدیوی نے سعودی عرب کے جنوبی علاقے پر حوثی ملیشیا کی جانب سے کیے گئے بیلسٹک میزائلوں کے دہشت گرد حملے کی شدید الفاظ میں مذمت کی ہے۔
جاسم البدیوی نے کہا کہ یہ بزدلانہ حملہ بین الاقوامی قانون اور بین الاقوامی انسانی قانون کی کھلی خلاف ورزی ہے اور اس سے ظاہر ہوتا ہے کہ حوثی ملیشیا خطے کے امن و استحکام کو سبوتاژ کرنے اور شہریوں و اہم تنصیبات کی سلامتی کو خطرے میں ڈالنے پر تلی ہوئی ہے۔
انہوں نے مزید کہا کہ حوثی ملیشیا کی جانب سے مسلسل دہشت گرد حملے، بین الاقوامی قوانین اور جنگ بندی کی خلاف ورزیاں اس بات کی متقاضی ہیں کہ عالمی برادری ایک مضبوط، فیصلہ کن اور مؤثر مؤقف اختیار کرے تاکہ ان جارحانہ اقدامات کا خاتمہ ہو، ذمہ دار عناصر کا احتساب یقینی بنایا جائے اور علاقائی و عالمی امن و سلامتی کا تحفظ ممکن ہو۔
سیکرٹری جنرل نے اس بات پر بھی زور دیا کہ سعودی عرب کا امن، خلیج تعاون کونسل کے تمام رکن ممالک کے مشترکہ امن کا حصہ ہے۔
انہوں نے کہا کہ جی سی سی ہر اس اقدام میں سعودی عرب کے ساتھ مکمل یکجہتی کا اظہار کرتی ہے جو مملکت اپنی سلامتی، استحکام، شہریوں اور اپنے ہاں مقیم افراد کے تحفظ کے لیے اختیار کرتی ہے۔
