اسرائیلی وزیر اعظم نیتن یاہو نے خبردار کیا ہے کہ اسرائیل پر کوئی بھی ایرانی حملہ، خواہ وہ براہِ راست ہو یا پراکسیز کے ذریعے، اس کا جواب "شدید" ردِعمل سے دیا جائے گا اور انہوں نے اس طرح کے قدم کو تہران کی طرف سے ہونے والی ایک بہت بڑی غلطی قرار دے دیا۔
نیتن یاہو نے "فاکس نیوز" نیٹ ورک کے ساتھ ایک انٹرویو میں کہا کہ اگر ایران نے براہِ راست یا بالواسطہ طور پر اسرائیل پر فائرنگ کی تو اسرائیل پوری طاقت سے جواب دے گا۔
انہوں نے یہ بھی کہا کہ جنگ یا تو ایرانی نظام کے خاتمے پر ختم ہوگی یا پھر جب ایران خطے میں اپنے تمام اقدامات کی قیمت ادا کرے گا۔ انہوں نے تہران پر اپنے پڑوسیوں کو نشانہ بنانے اور علاقائی استحکام کو خراب کرنے کا الزام لگایا۔
اسرائیلی وزیر اعظم نے کہا کہ ایران سب پر اور اپنے تمام پڑوسیوں پر فائرنگ کر رہا ہے۔ دیکھیں کہ وہ ایٹمی ہتھیار کے بغیر کیا کر رہا ہے، ذرا تصور کریں کہ اگر اس کے پاس ایٹمی ہتھیار ہوتا تو وہ کیا کرتا۔
ایرانی تنبیہ
نیتن یاہو کے بیانات اس کے بعد سامنے آئے جب ایرانی فوج نے خبردار کیا تھا کہ اگر امریکہ نے ایران پر حملے جاری رکھنے کا فیصلہ کیا تو جنگ مزید پھیل جائے گی۔
ایران کے فوجی ترجمان محمد اکرم نے سرکاری ٹی وی کو بتایا کہ اگر امریکی ایک بار پھر اسرائیل کے دھوکے میں آ گئے یا ان کی طرف داری کی اور جنگ کو جاری رکھنے پر اصرار کیا خاص طور پر فضائی حملوں کے ذریعے جنگ جاری رکھی تو یہ جنگ جغرافیائی طور پر مزید پھیلے گی۔
انہوں نے یہ بھی یاد دلایا کہ جنگ پہلے ہی بحیرہ احمر کے آبنائے باب المندب تک پھیل چکی ہے۔ اس سے ان کا اشارہ یمن میں ایران کی حمایت یافتہ حوثی گروپ کی حالیہ فوجی شدت کی طرف تھا۔
محمد اکرم نے مزید کہا کہ ہماری کارروائیوں کا دائرہ کار اب پورے خطے کو شامل کر رہا ہے۔ انہوں نے یہ بھی کہا کہ امریکہ کے لیے مشرقِ وسطیٰ میں صورتحال مشکل اور غیر مستحکم ہے۔ انہوں نے توقع ظاہر کی کہ واشنگٹن فی الحال ایک نئی حکمتِ عملی وضع کرنے کی کوشش کر رہا ہے۔
انہوں نے ہر آپشن اور ہر ممکنہ منظرنامے کے لیے ایران کی تیاری کی تصدیق بھی کی۔ یاد رہے اسرائیل نے جمعہ کے روز اعلان کیا تھا کہ نیتن یاہو منگل کے روز وائٹ ہاؤس میں امریکی صدر ڈونلڈ ٹرمپ سے ملاقات کریں گے۔
