ایران کی عدلیہ نے جنوری میں حکومت مخالف مظاہروں سے متعلق الزامات پر منگل کے روز دو افراد کو پھانسی دینے کا اعلان کیا اور اطلاعات کے مطابق یہ سزا ایک چوک میں سرِ عام دی گئی۔
عدلیہ کی آن لائن ویب سائٹ میزان نے کہا، "ابوالفضل سپاہی اور امیر حسین سفاری کی سزائے موت پر آج صبح عمل کیا گیا۔"
خبر رساں ایجنسی مہر نے دریں اثناء اطلاع دی ہے کہ پھانسی وسطی صوبہ اصفہان کے ملک شہر کے ایک چوک میں دی گئی جہاں لوگ موجود تھے۔
میزان نے بتایا کہ ان دونوں کو آٹھ جنوری کو "پولیس افسران پر چاقو اور خنجر سے حملہ کرنے، سڑک کنارے نصب اشاروں سے باندھنے، زمین پر کھینچنے اور ان پر پٹرول چھڑک کر آگ لگا دینے" کا مجرم پایا گیا تھا۔
اس میں مزید کہا گیا ہے کہ ان پر "محاربہ (خدا کے خلاف جنگ) کے الزامات تھے جس سے ملک میں امنِ عامہ اور سلامتی بری طرح متأثر ہوئی"۔
صوبہ اصفہان میں 19 جولائی کو اسی طرح کے الزامات کے تحت دو دیگر افراد کو پھانسی دی گئی تھی۔
