مشرق وسطی تنازع کے علی الرغم پاکستان کی ایندھن کی ضرورت پوری کریں گے: سعودی عرب

سعودی عرب نے پاکستان کو آبنائے ہرمز کی بندش کے باعث تیل کی ترسیل بحیرہ احمر کی ینبع بندرگاہ سے جاری رکھنے کی یقین دہانی کروائی ہے اور اسلام آباد نے ایک جہاز بھیج دیا ہے۔

پاکستان کی وزارت پیٹرولیم کے بدھ کو ایک بیان میں بتایا گیا کہ یہ انتظام اسلام آباد کی جانب سے سعودی عرب حکام کو لکھے گئے ایک خط کے نتیجے میں کیا گیا۔ بیان میں مزید بتایا گیا کہ ریاض نے پاکستان کی توانائی کی ہنگامی ضروریات کو پورا کرنے میں مدد کا وعدہ کیا ہے۔

قبل ازیں وفاقی وزیر پیٹرولیم علی پرویز ملک نے سعودی عرب کے سفیر نواف سعید المالکی سے ملاقات کی، جس میں پاکستان کے لیے بحیرہ احمر میں واقع بندرگاہ ینبع کے ذریعے خام تیل کی متبادل سپلائی روٹ کی یقین دہانی کرائی گئی۔

علی پرویز ملک کے مطابق سعودی ذرائع نے ینبع سے سپلائی کی سکیورٹی اور پاکستان کے لیے ترجیحی رسائی کی ضمانت دی ہے، جبکہ ایک جہاز کو پاکستان کے لیے خام تیل اٹھانے کے لیے روانہ کرنے کی بھی یقین دہانی کرائی گئی۔

سعودی سفیر نے کہا کہ کسی بھی ہنگامی ضرورت کے پیشِ نظر پاکستان کے ساتھ بھرپور تعاون جاری رہے گا اور دونوں ممالک ہر آزمائش میں ایک دوسرے کے ساتھ کھڑے رہیں گے۔

وفاقی وزیر نے کہا کہ حکومت عوام کے لیے توانائی کی سپلائی چین کے تسلسل کو یقینی بنانے کے لیے بھرپور کوششیں کر رہی ہے، اور موجودہ حالات میں سعودی عرب جیسے برادر ممالک کی حمایت پاکستان کے لیے انتہائی اہمیت کی حامل ہے۔

دریں اثنا امریکی صدر ڈونلڈ ٹرمپ نے بدھ کو کہا ہے کہ اگر ضرورت پڑی تو امریکی بحریہ آبنائے ہرمز سے گزرنے والے تیل بردار جہازوں کی جلد از جلد نگرانی اور حفاظت شروع کرے گی۔

امریکی و اسرائیلی حملے کے بعد سے ردعمل کے طور پر ایران کی نیم فوجی تنظیم پاسداران انقلاب نے آبنائے ہرمز بند کر رکھی ہے۔

اس صورت حال میں ٹرمپ نے اپنے ٹروتھ سوشل اکاؤنٹ پر لکھا: ’میں نے امریکہ کی ترقیاتی مالیاتی کارپوریشن کو ہدایت دی ہے کہ وہ نہایت مناسب قیمت پر خلیج سے گزرنے والی تمام سمندری تجارت، خصوصاً توانائی کے مالی تحفظ کے لیے سیاسی رسک انشورنس اور ضمانتیں فراہم کرے۔ یہ سہولت تمام جہاز رانی کمپنیوں کے لیے دستیاب ہوگی۔‘

انہوں نے مزید کہا: ’اگر ضرورت پڑی تو ریاست ہائے متحدہ کی بحریہ آبنائے ہرمز سے گزرنے والے تیل بردار جہازوں کی جلد از جلد نگرانی اور حفاظت شروع کرے گی۔ کسی بھی صورت میں، ریاست ہائے متحدہ دنیا کو توانائی کی بلا رکاوٹ فراہمی کو یقینی بنائے گا۔‘

بقول ٹرمپ: ’امریکہ کی معاشی اور فوجی طاقت دنیا میں سب سے عظیم ہے۔ مزید اقدامات بھی کیے جائیں گے۔‘