• صفحہ اول
• مشرق وسطی

سعودی عرب کے وزیر خارجہ شہزادہ فیصل بن فرحان نے اپنے ایرانی ہم منصب عباس عراقچی سے ٹیلی فونک پر رابطہ کیا۔ اس دوران خطے کی تازہ صورت حال پر تبادلہ خیال ہوا اور اس کے امن و استحکام کے لیے تعاون کے طریقوں پر بات چیت ہوئی۔

ادھر گذشتہ روز دو سعودی ذرائع نے خبر رساں ادارے "اے ایف پی" کو بتایا کہ سعودی عرب نے ایران کو آگاہ کر دیا ہے کہ وہ اس کے خلاف کسی بھی ممکنہ امریکی فوجی کارروائی کے لیے نہ تو اپنی فضائی حدود اور نہ اپنی سرزمین استعمال کرنے کی اجازت دے گا۔

خبر رساں ایجنسی کے مطابق سعودی عرب نے تہران کو براہ راست یہ پیغام دیا ہے کہ وہ ایران کے خلاف کسی بھی ممکنہ فوجی کارروائی کا حصہ نہیں بنے گا اور نہ سعودی سرزمین یا فضائی حدود اس مقصد کے لیے استعمال ہوں گی۔

فرانسیسی ایجنسی کے مطابق سعودی بیان ایسے وقت سامنے آیا ہے جب تہران میں عوامی احتجاج میں شدت آ رہی ہے، جبکہ ساتھ ہی امریکہ کی جانب سے ایران کے خلاف فوجی کارروائی کے انتباہات بھی دیے جا رہے ہیں۔