سعودی وزیر دفاع اور یمنی صدر کی جنوبی مسئلے کے حل کے لیے کوششیں جاری رکھنے پر اتفاق

سعودی عرب کے وزیر دفاع شہزادہ خالد بن سلمان نے یمنی صدارتی قیادت کونسل کے چیئرمین ڈاکٹر رشاد العلیمی اور کونسل کے ارکان سے ملاقات کی۔ اس ملاقات میں یمنی وزیر اعظم سالم بن بریک اور عدن کے گورنر وزیر مملکت عبدالرحمن الیافعی بھی موجود تھے۔

سعودی وزیر دفاع نے سماجی رابطے کے پلیٹ فارم ’ایکس‘ پر اپنے بیان میں کہا کہ صدارتی کونسل کے ارکان سے ملاقات میں جنوبی مسئلےکے مستقبل کے حوالے سے ریاض کانفرنس کے ذریعے کوششیں جاری رکھنے کی اہمیت پر زور دیا گیا تاکہ منصفانہ حل کے لیے ایک جامع تصور تیار کیا جا سکے۔

ملاقات کے دوران یمن کی صورتحال میں ہونے والی تازہ پیش رفت اور یمن بحران کے خاتمے کے لیے جامع سیاسی حل کی کوششوں پر بھی تبادلہ خیال کیا گیا تاکہ ملک میں امن اور استحکام حاصل کیا جا سکے۔

شہزادہ خالد بن سلمان نے کہا کہ انہوں نے یمنی قیادت کو آگاہ کیا کہ سعودی قیادت کی ہدایات کے تحت مملکت یمن کے برادر عوام کے لیے معاشی مدد اور ترقیاتی منصوبوں اور پروگراموں کا پیکج مختلف یمنی صوبوں میں جاری رکھے گی۔

سعودی عرب یمن میں امن ،سکیورٹی ،استحکام اور خوشحالی کے قیام کے لیے کوشاں ہے اور ملک کو تنازعات کے مرحلے سے نکال کر استحکام اور سکیورٹی کے دور میں داخل کرنے کے ساتھ ساتھ یمنی عوام کے بہتر مستقبل کی امنگوں کو پورا کرنے پر توجہ دے رہا ہے۔

دوسری جانب یمنی صدارتی قیادت کونسل کے سربراہ ڈاکٹر رشاد العلیمی نے سعودی وزیر دفاع سے اپنی ملاقات کو نتیجہ خیز قرار دیا۔ انہوں نے کہا کہ اس ملاقات میں قومی صورتحال کی تازہ پیش رفت اور سعودی عرب کی جانب سے یمن کی اسٹریٹجک شراکت داری کے تحت حمایت پر گفتگو ہوئی جو ریاستی اداروں کی بحالی، امن استحکام اور سلامتی کے حوالے سے یمنی عوام کی توقعات پر پورا اترتی ہے۔

سعودی عرب نے یمن کو اب تک ایک ارب نوے کروڑ سعودی ریال تک کا ترقیاتی تعاون فراہم کیا ہے۔ آج سعودی پروگرام برائے ترقی و تعمیر یمن نے مختلف یمنی صوبوں میں 28 ترقیاتی منصوبوں اور اقدامات پر مشتمل ایک نئے پیکج کا آغاز کیا جو بنیادی اور اہم شعبوں کا احاطہ کرتے ہیں تاکہ ملک کے استحکام کو تقویت دی جا سکے۔

شہزادہ خالد بن سلمان نے وضاحت کی کہ یہ تعاون یمن اور اس کے برادر عوام کے لیے بہتر مستقبل کی تعمیر میں سعودی عرب کی سکیورٹی اور استحکام کے عزم کی عکاسی کرتا ہے۔

اسی تناظر میں ڈاکٹر رشاد العلیمی نے کہا کہ سعودی پروگرام برائے ترقی و تعمیر یمن کے تحت مختلف صوبوں میں اعلان کردہ ترقیاتی منصوبے بحالی اور تعمیر نو کے مرحلے کی بنیادی بنیاد ہیں اور خدمات اور روزگار کے مواقع بہتر بنانے کے لیے وسیع تر پروگراموں کا پیش خیمہ ہیں جو یمنی ریاست کی ہر سطح پر حمایت کے سعودی عزم کو ظاہر کرتے ہیں۔

قبل ازیں ریاض نے ڈاکٹر رشاد العلیمی کی درخواست پر مثبت ردعمل دیا تھا جس میں جنوبی یمن کے تمام فریقین کو ریاض میں ایک جامع کانفرنس میں جمع کر کے جنوبی مسئلے کے منصفانہ حل پر مکالمہ کرنے کی تجویز دی گئی تھی۔

ریاض جنوبی مسئلے کو ایک منصفانہ معاملہ سمجھتا ہے جس کے تاریخی اور سماجی پہلو ہیں اور اس کے حل کا واحد راستہ یمن میں جامع سیاسی حل کے تحت مکالمہ ہے۔ سعودی عرب یمن کی سکیورٹی استحکام اور خودمختاری کے لیے اپنے عزم کی تجدید کرتا ہے اور صدارتی قیادت کونسل کے سربراہ رشاد العلیمی اور ان کی حکومت کی مکمل حمایت جاری رکھنے کا اعادہ کرتا ہے۔