یہ سائنس فکشن نہیں، آپ کا فون آپ سے پہلے آپ کی ڈپریشن کو جان لیتا ہے
ہر کلک، سوائپ، قدم یا ٹیکسٹ میسج ایک چھوٹا ڈیٹا پوائنٹ بن سکتا ہے
ٹیکنالوجی کی رفتار اتنی تیز ہو چکی ہے کہ اب ہم ان چیزوں کا تجربہ کر رہے ہیں جو پہلے صرف سائنس فکشن فلموں میں دیکھی جاتی تھیں اور آخری چیز جس کا انسان تصور کر سکتا ہے وہ یہ ہے کہ آپ کا فون آپ کے مزاج کا پیمانہ بن رہا ہے۔ آپ کا فون آپ کے محسوس کرنے سے پہلے ہی ڈپریشن کی معمولی علامات کو بھی بے نقاب کر دے گا۔ یہ بات سائنس فکشن لگ سکتی ہے لیکن "ڈیجیٹل فینوٹائپنگ" کے حوالے سے یہ ایک حقیقت ہے جو ہمارے قریب آ رہی ہے۔
نارتھ ویسٹرن یونیورسٹی آف میڈیسن کی ایک چھوٹی تحقیق اس بات کی طرف اشارہ کرتی ہے کہ آپ کے سمارٹ فون کے سینسرز کے ڈیٹا کے ذریعے، فون کے استعمال کے دورانیے اور روزانہ کی جغرافیائی نقل و حرکت کو ٹریک کر کے ڈپریشن کا پتہ لگانا ممکن ہے۔
ویب سائٹ eurekalert کے مطابق جتنا زیادہ وقت آپ اپنے فون کے استعمال میں گزاریں گے، آپ کے ڈپریشن میں مبتلا ہونے کے امکانات اتنے ہی زیادہ ہوں گے۔ ڈپریشن کا شکار افراد کے فون استعمال کرنے کی یومیہ اوسط تقریباً 68 منٹ تھی۔ غیر متاثرہ افراد کی اوسط تقریباً 17 منٹ تھی۔ سادہ الفاظ میں، ڈیجیٹل فینوٹائپنگ کا مطلب آپ کی صحت کے بارے میں مزید جاننے کے لیے ذاتی آلات کے ذریعے آپ کے رویے کی پیمائش کرنا ہے۔
ہارورڈ یونیورسٹی کے محققین کی ایک ٹیم نے اس اصطلاح کو ذاتی ڈیجیٹل آلات کے ڈیٹا کا استعمال کرتے ہوئے، لمحہ بہ لمحہ انفرادی سطح پر انسانی طرزِ عمل کی مقداری پیمائش بیان کرنے کے لیے وضع کیا ہے۔ دوسرے لفظوں میں یہ نظام آپ کی روزمرہ کی سرگرمیوں، احساسات اور خیالات کی تفصیلی تصویر کشی کے لیے سمارٹ فونز، پہننے کے قابل آلات وغیرہ سے مسلسل ڈیجیٹل فنگر پرنٹس جمع کرتا ہے۔
ویب سائٹ psychologytoday کے مطابق ہر کلک، سوائپ، قدم یا ٹیکسٹ میسج ایک چھوٹا ڈیٹا پوائنٹ بن سکتا ہے اور وقت گزرنے کے ساتھ یہ ڈیٹا پوائنٹس ایک منفرد شناخت یعنی "ڈیجیٹل فینوٹائپ" بناتے ہیں جو آپ کی نفسیاتی حالت کی عکاسی کر سکتا ہے۔
آپ کا آلہ خاموشی کے وقفوں سے آپ کی نیند کے معمولات کی نگرانی کرتا ہے۔ کالز کی تعداد کے ذریعے سماجی تنہائی کو دیکھتا ہے اور لوکیشن انڈیکس کے ذریعے یہ بھی دیکھتا ہے کہ آیا آپ گھر میں بند ہیں یا دنیا کی سیر کر رہے ہیں۔ یہاں تک کہ ٹائپنگ کی رفتار اور ایپلی کیشنز کے استعمال کے طریقے بھی ڈپریشن کی علامات بن چکے ہیں۔ ڈیجیٹل ہیلتھ میگزینز میں شائع ہونے والی کئی تحقیقات نے اس کی تصدیق کی ہے۔ یہ معاملہ بالکل ایسا ہی ہے جیسے آپ کی موسیقی کی ترجیحات کا تجزیہ کیا جاتا ہے لیکن آپ کے موسیقی کے ذوق کے بجائے آپ کی نفسیاتی کمزوریوں کا تجزیہ کرلیا جاتا ہے۔
