شامی فوج کا بمبار طیارہ اڑان بھرتے ہی گر کرتباہ

شامی حکومت کے عسکری ذریعے کے مطابق حماۃ شہر کے ایک فوجی اڈے سے ایک بمبار طیارہ اڑان بھرتے ہی گر کرتباہ ہوگیا۔ ذرائع کے مطابق طیارے کا حادثہ فنی خرابی کے باعث پیش آیا ہے۔

غیرملکی خبر رساں اداروں کے مطابق شامی فوج کے ذریعے نے یہ واضح نہیں کیا کہ آیا طیارے کا حادثہ کب پیش آیا۔ اس حادثے کی مزید تفصیلات بھی سامنے نہیں لائی گئی ہیں۔

خیال رہے کہ رواں سال میں اب تک شام میں روسی ساختہ کئی جنگی طیارے مختلف حادثات کے نتیجے میں دوران پرواز گر کرتباہ ہوتے رہے ہیں۔ شامی حکومت اور فوج کی جانب سے ان حادثات کی وجہ فنی خرابی بتائی جاتی رہی ہے۔

شامی اپوزیشن کی جانب سے خبررساں ایجنسی’رائٹرز‘ کو بتایا گیا ہے کہ حماۃ کے فوجی اڈے پر گر کر تباہ ہونے والا بمبار طیارہ روسی ساختہ میگ 21 ہے تاہم آزاد ذرائع سے اس کی تصدیق نہیں ہوسکی۔