شیعہ عالم نے قطیف میں سعودی پولیس پر حملے کی مذمت کردی

معروف سعودی شیعہ عالم شیخ حسن الصفار نے مشرقی صوبے کے شہر قطیف میں پولیس پر دہشت گردی کے حملے کی مذمت کردی ہے۔

انھوں نے ایک بیان میں کہا ہے کہ ''سکیورٹی افسروں اور پولیس پر متشدد حملے صوبے کے عوام کی حقیقی اقدار کے نمائندہ نہیں ہیں۔ہمیں مستقبل میں پولیس پر متشدد حملوں کی روک تھام کے لیے مل جل کر کام کرنا ہوگا''۔

شیخ الصفار نے قطیف شہر میں واقع الرسالہ مسجد میں اسی موضوع پر جمعہ کا خطبہ دیا تھا۔انھوں نے کہا کہ ''جو کوئی بھی تشدد کی اس طرح کی کارروائیاں کرتا ہے،وہ نہ صرف متاثرین کو نقصان پہنچاتا ہے بلکہ وہ جس کمیونٹی سے تعلق رکھتے ہیں ،انھیں بھی مجروح کرتا ہے''۔

قطیف میں گذشتہ ماہ پولیس کی ایک گشتی پارٹی پر حملے میں ایک پولیس افسر جاں بحق اور ایک زخمی ہوگیا تھا۔العربیہ نیوز کے نمائندے نے اطلاع دی تھی کہ ایک نامعلوم گاڑی پر سوار مسلح حملہ آوروں نے پولیس افسروں پر فائرنگ کی تھی جس سے پولیس افسر سلطان المطائری جاں بحق ہوگئے تھے اور ان کا ساتھی زخمی ہوگیا تھا۔