.

صدر عمر البشیر کے دورۂ روس سے قبل سخوئی لڑاکا جیٹ خرطوم پہنچ گئے

پہلی اشاعت: آخری اپ ڈیٹ:

سوڈان نے روس سے چوتھی نسل کے سخوئی ایس یو 35 لڑاکا جیٹ خرید کیے ہیں اور ان کی پہلی کھیپ گذشتہ ہفتے سوڈان پہنچ گئی ہے۔البتہ دونوں ملکوں کی جانب سے ان طیاروں کی تعداد نہیں بتائی گئی ہے۔سوڈان روس سے یہ لڑاکا طیارے حاصل کرنے والا پہلا عرب ملک ہے۔

دونوں ملکو ں کے درمیان دفاعی شعبے میں ایک سمجھوتے پر عمل درآمد سے صرف چار روز بعد سوڈانی صدر عمر حسن البشیر آیندہ جمعرات کو روس کے تین روزہ دورے پر روانہ ہونے والے ہیں۔ یہ ان کا روس کا پہلا دورہ ہوگا۔

سوڈانی حکام کے مطابق صدر عمر البشیر کے دورۂ ماسکو کے موقع پر دونوں ملکوں کے درمیان اعلیٰ سطح کے متعدد سمجھوتے متوقع ہیں اور صنعت وتجارت ، کان کنی ، تیل اور جدید سکیورٹی انڈسٹریز کے شعبوں میں مختلف سمجھوتے طے پائیں گے۔

واضح رہے کہ سوڈان کی فضائیہ کے ڈپٹی کمانڈر صلاح الدین عبدالخالق سعید نے مارچ میں روس کے ساتھ لڑاکا طیاروں کی خریداری سے متعلق سودے کا اعلان کیا تھا۔انھوں نے روس کی خبررساں ایجنسی سپوتنک سے گفتگو کرتے ہوئے کہا تھا کہ ان طیاروں کے حصول سے سوڈان کے دفا ع کو مضبوط بنانے میں مدد ملے گی اور ان کے ذریعے کسی بھی خطرے سے نمٹا جا سکے گا۔