بیت المقدس کے مسئلے پر اسرائیل کے ساتھ تعلقات منقطع ہو سکتے ہیں : ترکی

ترکی کے صدر رجب طیب ایردوآن نے منگل کے روز اعلان کیا ہے کہ بیت المقدس کا مسئلہ نہایت اہم ہے۔ انہوں نے واضح کیا کہ یہ تمام مسلمانوں کے لیے سُرخ لکیر کی حیثیت رکھتا ہے۔

ایردوآن کا مزید کہنا تھا کہ بیت المقدس کو اسرائیل کا دارالحکومت تسلیم کرنا ایسا معاملہ ہے جس کا نتیجہ انقرہ کے اسرائیل کے ساتھ سفارتی تعلقات منقطع ہونے کی صورت میں نکل سکتا ہے۔

یاد رہے کہ وہائٹ ہاؤس نے پیر کی شام ایک اعلان میں کہا تھا کہ امریکی صدر نے امریکی سفارت خانے کو بیت المقدس منتقل کرنے اور بیت المقدس کو اسرائیل کا دارالحکومت تسلیم کرنے کے حوالے سے فیصلہ ملتوی کر دیا ہے۔ اسرائیل نے بیت المقدس بالخصوص اس کے مشرقی حصّے پر 1967 سے قبضہ کر رکھا ہے۔