.

یمن : صعدہ اور حجہ کے محاذوں پر200 سے زیادہ حوثی جنگجو اور کمانڈر ہلاک

پہلی اشاعت: آخری اپ ڈیٹ:

یمن کے دو صوبوں صعدہ اور حجہ میں گذشتہ تین روز کے دورا ن میں یمنی فوج کے ساتھ لڑائی میں متعدد کمانڈروں سمیت 200 سے زیادہ حوثی جنگجو ہلاک اور بیسیوں زخمی ہوگئے ہیں۔

حجہ میں ذرائع نے بتایا ہے کہ فوج نے حوثی ملیشیا کے بیلسٹک میزائل چلانے کے پیڈ تباہ کر دیے ہیں جبکہ عرب اتحاد کے لڑاکا طیاروں نے حوثی ملیشیا کے 18 اڈوں کو اپنے حملوں میں نشانہ بنایا ہے۔ صوبہ البیضاء میں بھی لڑائی میں بارہ حوثی جنگجو ہلاک ہوگئے ہیں۔

یمنی فوج نے شمالی صوبے صعدہ کے مختلف علاقوں میں حوثی ملیشیا کے خلاف لڑائی میں پیش قدمی جاری رکھی ہے اور وہاں مختلف محاذوں پر ان کے درمیان خونریز جھڑپوں کی اطلاعات ملی ہیں۔یمن فوج نے صعدہ کے دو علاقوں ثحر اور بکیل المیر پر قبضہ کر لیا ہے۔اس سے قبل یمنی فوج نے ضلع حیران پر دوبارہ کنٹرول حاصل کر لیا تھا۔

حوثی ملیشیا کو صعدہ کے علاقے میران میں سرکاری فوج کے ساتھ جھڑپوں میں بھاری جانی نقصان اٹھانا پڑا ہے اور وہاں لڑائی میں اس کے تین کمانڈر احمد یحییٰ النعمانی ، صلاح محمد جعادر اور صلاح محمد علی بداش ہلاک ہوگئے ہیں۔

عسکری ذرائع کے مطابق یمنی فوج نے صعدہ اور حجہ کے تین اضلاع میں متعدد دیہات اور علاقوں کو حوثیوں کے قبضے سے آزاد کرا لیا ہے۔