سکیورٹی سروسز پر حملے قبول نہیں کریں گے: اردنی بادشاہ

اردنی بادشاہ شاہ عبداللہ دوم اور شہزادہ حسن بن طلال نے جمعہ کے روز معان گورنریٹ پولیس کے ڈپٹی ڈائریکٹر کرنل عبدالرزاق کی وفات پر اظہار تعزیت کیا ہے۔ کرنل عبد الرزاق جمعرات کو احتجاج کے دوران انتقال کر گئے تھے۔

اردنی بادشاہ نے اس بات پر زور دیا کہ جو بھی ریاست کے خلاف ہتھیار اٹھاتا ہے اور عوامی املاک اور شہریوں کے حقوق پر قبضہ کرتا ہے اس کے ساتھ سختی سے نمٹا جائے گا۔ انہوں نے کہا حملوں اور توڑ پھوڑ کی کارروائیاں وطن کی سلامتی کو بری طرح متاثر کرتی ہیں، اور ہم اس کی اجازت نہیں دیں گے۔

شاہ عبداللہ دوم نے جرش کے ضلع الکفر میں دیوان الدلابیح میں جاں بحق پولیس افسر کے گھر جا کر اہل خانہ سے اظہار تعزیت کیا اور کہا یہ میرا بیٹا اور پوری قوم کا بیٹا ہے۔ ہم اس وقت تک آرام سے نہیں بیٹھیں گے جب تک کہ مجرم کو اس کے گھناؤنے جرم پر سزا نہیں مل جاتی۔

شاہ اردن کی تعزیت کے لئے آمد۔

اردنی بادشاہ نے مزید کہا کہ ہم اپنی سکیورٹی سروسز کے ان رہنماؤں کی توہین یا ان پر حملے کو ہر گز قبول نہیں کریں گے جو وطن اور شہریوں کی حفاظت پر نظر رکھتے ہیں۔

انہوں نے ان مشکل معاشی حالات کا حوالہ دیا جن سے شہری گزر رہے ہیں اور قانون کے اندر رہتے ہوئے پرامن طریقے سے اپنی رائے کا اظہار کرنے کے ان کے حق کا حوالہ دیا۔ انہوں نے کہا ریاستی ادارے قانون کے مطابق مجرموں کا احتساب کرنے کے لیے تمام تر اقدامات کریں گے۔