دنیا تباہی کے دہانے کے قریب پہنچ چکی ہے ... بل گیٹس نے خبردار کر دیا !

امریکی ارب پتی اور مائیکروسافٹ کے بانی بل گیٹس نے خبردار کیا ہے کہ دنیا "ایک خطرناک موڑ پر کھڑی ہے" اور اگر فوری اقدام نہ کیا گیا تو "انسانیت تباہی کے دہانے پر پہنچ سکتی ہے"۔ انھوں نے فرانسیسی اخبار L’Express کو دیے گئے انٹرویو میں کہا کہ آئندہ بیـس سال انسانیت کے مستقبل کا تعین کریں گے، کیونکہ عالمی تعاون کا نظام بکھر رہا ہے، قوم پرستی بڑھ رہی ہے اور ترقیاتی فنڈز سکڑ رہے ہیں۔

گیٹس کے مطابق امیر ممالک اندرونی مسائل میں الجھ رہے ہیں جبکہ غریب دنیا شدید ماحولیاتی، غذائی اور صحت کے بحرانوں کا سامنا کر رہی ہے۔ سال 2023 میں ترقیاتی امداد تقریباً 5 فی صد کم ہوئی، حالانکہ ضرورت اس سے کہیں زیادہ ہے۔ انھوں نے کہا کہ "اندرونی مفادات پر مرکوز ہونے کا رجحان پہلے کبھی اتنا طاقت ور نہیں تھا"، جس کے نتیجے میں عالمی ذمہ داریوں کا احساس کمزور پڑ رہا ہے۔

عالمی بینک کے مطابق سال 2030 تک 57 کروڑ افراد انتہائی غربت میں رہ سکتے ہیں، جو اقوامِ متحدہ کے ترقیاتی اہداف کے لیے بڑا خطرہ ہے۔ گیٹس نے کہا "دنیا بھر میں عدم مساوات خطرناک حد تک جڑ پکڑ رہی ہے۔"

تاہم انھوں نے بچوں کی صحت میں بہتری کو امید کی ایک کرن قرار دیا۔ ان کے مطابق سال 1990 میں ہر سال 1 کروڑ 20 لاکھ سے زائد بچے پانچ سال کی عمر سے پہلے مر جاتے تھے، جبکہ یہ تعداد 2021 میں کم ہو کر 50 لاکھ تک آ گئی۔ اگر صحت کے نظام میں سرمایہ کاری جاری رہی تو یہ تعداد بیس لاکھ تک نیچے آ سکتی ہے۔ تاہم انھوں نے خبردار کیا کہ کووِڈ-19 وبا نے ویکسین پروگراموں کو شدید متاثر کیا ہے اور معمول کی ویکسینیشن کی سطح بحال ہونے میں کئی سال لگ سکتے ہیں۔

ماحولیاتی تبدیلی کو گیٹس نے "خطرات کو دوگنا کرنے والا عنصر" قرار دیا جو طوفانوں، خشک سالی اور سیلاب کے ذریعے ترقیاتی پیش رفت کو مٹا دیتا ہے۔ اقوامِ متحدہ کے مطابق سال 2030 تک ماحولیاتی موافقت کے لیے 300 ارب ڈالر سالانہ درکار ہوں گے، جب کہ موجودہ سرمایہ کاری اس کے قریب بھی نہیں۔

بل گیٹس نے امید ظاہر کی کہ ٹیکنالوجی ... خصوصاً کاربن جذب کرنے، ایٹمی توانائی اور متبادل پروٹین کے شعبوں میں دنیا کو کم اخراج والے مستقبل کی طرف لے جا سکتی ہے، لیکن انھوں نے کہا کہ "ٹیکنالوجی اکیلے کافی نہیں، اسے سمجھ دار پالیسیوں، عالمی تعاون اور منصفانہ تقسیم کے ساتھ جوڑنا ہو گا۔"

ایک غیر روایتی اعلان میں گیٹس نے کہا کہ ان کی فلاحی تنظیم "بل اینڈ میلینڈا گیٹس فاؤنڈیشن" ان کی اور میلینڈا کی وفات کے 25 سال بعد ختم کر دی جائے گی تاکہ وسائل کو بروقت استعمال کیا جا سکے۔ ان کے مطابق "حکومتوں کو قیادت کرنی چاہیے، لیکن فلاحی ادارے خطرہ اٹھا کر وہ خلا پُر کر سکتے ہیں جہاں سیاست قدم رکھنے سے ہچکچاتی ہے۔"